Innuttaasut 6.628-it aningaasatigut ajornartoortinneqassapput
Kalaallit Nunatsinni ilaqutariit aningaasaqarnikkut unamminartumik inissisimareersimappata, suli innuttaasunut 6.628-nut 2020 unamminarninngussaaq.
Qularnanngitsumik inuppassuit 2020-mut skattekortertik tigugamikku kaffisukkaminnik tupingajassimassapput, tassami Akileraarnermut qullersaqarfimmit skattekortiliorsimapput ilaatigut allaat ilanngaatitaqanngitsumik 50 procent tikillugu innuttaasut akileraartussanngorlugit, taamatut nalaataqartut amerlanersaasa 2018-ip ingerlanerani utoqqalinissaminnut ileqqaarnissamut pisussaaffitsik naammassisimannginnamikku akileraaruteqarnerulersinnerisigut angummatsinniarneqarnissaat siunertarineqarmat.
Aviisi Sermitsiaq taama allappoq.
Innuttaasut ilaasa tuppalliutigisinnaasaannik paasinarsivoq skattekortit suliarineqarneranni kukkusoqarsimasoq, ilaatigut innersuussutigineqarlutik sulisitsisut nalunaaruteqanngitsoorsimanerat aammalu ilaatigut innersuussutigineqarluni IT-kkut atortorissaarutitigut kukkunerit pinngorsimanerat, taamaalillunilu skattekorti eqqunngitsoq tunniunneqartoorsimalluni. Taamatut nalaataqartunut Akileraarnermut qullersaqarfiup neriorsuutigaa piaarnerpaamik aaqqinneqassasut.
Taamaakkaluartoq innuttaasunut 6.628-nut piviusuuvoq avaqqunneqarsinnaananilu, allaat 6 procent tikillugu toqqaannartumik ilanngaatitaqanngitsumillu akileraartussanngortitaanerat, tassa utoqqalinissaminnut ileqqaartussaatitaaneq 1. januar 2018-mi atuutilersinneqartoq naammassisimanngikkaanni ileqqaagassat akileraarnerulersitsinikkut aaniarneqarmata.
3.000 - 4.500 missaanni inuuniutikinnerulissapput
Tassa innuttaasut 6.000-nit amerlanerusut allaqqunneqarsinnaanngitsumik toqqaannaq 50 procent tikillugu akileraartussaatitaalissapput, tamannalu isumaqarpoq innuttaasut taakku akornanni amerlasoorpassuit qaammammut 4.500 koruunit missaannik annertutigisumik inuuniutikinnerulersinneqassasut. (Kalaallit Nunaanni naatsorsueqqissaartarfiup kisitsisaataannit isertitat akileraarutigineqartussat 2018-mi tunngavigalugit naatsorsuineruvoq).
Agguaqatigiissillugu innuttaasut isertittagaat tunngavigalugu, imatut isikkoqarpoq innuttaasut pineqartut akornanni arlalippassuit aningaasaqarnermikkut annertuumik ajornartorsiuteqalernissaminnut aarlerinartorsiulersinnaasut, tassami isertitanit aningaasartuutit aalajangersimasut pisussaaffiusullu aamma naammassineqartussaammata.
Aviisimi Sermitsiami atuarnerusinnaavutit, anaanaasullu aningaasaqarnikkut inissisimalernini pillugu ernumasoq aamma atuarsinnaallutit. Aviisi uani pissarsiariuk: