Innuttaasut 1000-it missaanniittut DK-mit ingerlariaqqissinnaanngitsut
Coronamut atatillugu suleqatigiissititat ilisimatitsissutigaat, januaarip aallartinnerani timmisartuussinerit matuneqarmata, inuit 1000-it missaanniittut juullisioriareersimallutik Kalaallit Nunaannut angerlaqqinniarlutik ingerlariaqqissinnaajunnaarsimasut. Air Greenland taakku ilaaffissaannik allanngortiterileruttorpoq.
Namminersorlutik Oqartussat decembarip 30-ani nalunaarutigimmassuk, 2021-mi januaarip aqqaneq-aappaata tungaanut Kalaallit Nunaannut angalanissaq matuneqartoq, inuit 1100-1300-t missaanniittut Danmarkimiit Kalaallit Nunaannut angalanissamut bilitsissaqareersimapput.
Taakku ilaat "inuiaqatigiinnut pingaarutilimmik suliassaqarnertik" pissutigalugu angerlamut timminissamut periarfissaqartinneqarsimapput. Coronamut atatillugu suleqatigiissitat erseqqissumik oqaatigisinnaannginnerarpaat inuit qasserpiaat Danmarkimit ingerlariaqqissinnaajunnaarsimanersut, taakkuli 1000-it missaanniissorineqartut, Hans-Peder Barlach Christensen Coronamut atatillugu suleqatigiissitanut pisortaasoq ilisimatitsivoq.
Immikkut pinnittoqassanngitsoq
Coronamut atatillugu allattoqarfimmi angalasinnaasunik akuersissuteqartartut tassaapput, timmisartumut ilaanissamut bilitseqareersut allallu januaarip aqqaneq-aappaata kingorna nunatsinnut tikittoqaqqittalernissaa sioqqullugu angerlarnissaminnut tunngavissaqarluarlutik qinnuteqarsimasut pillugit allattorsimaffiuteqartut.
Namminersorlutik Oqartussat siusinnerusukkut nalunaarutiginikuuaat, sulisutik angalasoqannginnissaanik innersuussummik malinninnatik aallarsimasut naamminneq akisussaaffigissagaat.
Tassa inuit pilersaarutaasutut angerlarsinnaanatillu suliartorsinnaanngitsut namminneq aningaasartuuteqartussaapput. Sulinngiffeqarnertik namminneq akilissavaat imaluunniit sulinngiffeqarfissatik namminneq akilissavaat.
Coronamut atatillugu suleqatigiissitat erseqqissaatigaat, Namminersorlutik Oqartussani allanilu sulisut immikkoortillugit pineqassanngitsut. Suleqatigiissitanit ilisimatitsissutigineqarpoq, Air Greenlandip inuit januaarip aqqaneq-aappaata kingorna angalanissamut bilitsii allanngortiterlugit suliarigai, aamma inuit pineqartut attaveqarfigineqassasute.
Air Greenland nersugassaasoq
Coronamut atatillugu suleqatigiissitat Air Greenlandip angalaffissarpassuarnik allanngortiteraluni suliaqarnera kakkagivaat.
- Air Greenlandimi sulisut iliuuseqarnerat nersugassaavoq. Piumasavummi malillugit taamatut suliaqarput, apeqqusiinngivillutillu tamanna ulapputigalugu. Timmisartumut ilaanissamut bilitsit upernaaq pisumut sanilliullugu ajornannginnerusumik iliuuseqarfiginiarneqarput, tamannalumi Air Greenlandimit ineriartortinneqaqataasimavoq, Hans-Peder Barlach Christensen oqarpoq.
Ulluni makkunani ilaasussat pilersaarutaasutut aallarnissamut takkuttoqannginnissaa pillugu sms-ikkut ilisimatinneqartassapput, allarnissalli allanngortiterneqarnerannut atatillugu tamanna ajornartorsiutaassanngilaq, Hans-Peder Barlach Christensen neriorsuivoq.
Tamatumunnga pissutaavoq, Air Greenlandip ilaasussatik aallarnissaminnik taamaatitsiinnannginneranni taakku nutaanik bilitsissarsinissaannik salliutitsilluni iliuuseqarnera.