Innuttaasunut tassaarsuarmit eqqugaasunut nutaarsiassatsialaanngitsoq
Oqorsaatit kukkuneqarsimaneri pissutigalugit, nunaqarfimmiut Karrat Kangerluanni juunimi 2017-imi qimagussortinneqarsimasut, Uummannami inissiat taartissat tigunissaannut ukiup affaa utaqqeqqittariaqassavaat.
Avannaani aasaanerani 2017-imi tassaarsuaqarnerata kingorna annikilliuuteqareeqaat.
Inissiat taartissat qaammatinik arlalinnik kinguaattoornerannik maanna nalunaarfigineqarput.
- Inissiat taartissat sanaartorneqarneri pilersaarutit malillugit ingerlapput. Kisiannili sanaartukkanik nakkutilliisut misissuinerminni ajoraluartumik paasivaat, ruujorit sumiiffimmi imermik pilersuivimmut kuuffeqarfimmullu atasussat oqorsaataat tunisassiarineqarnerminni kukkuneqarsimasut. Kukkunerit kingunerisaannik ruujorit taarsersorneqartariaqarput, kukkunerit najukkami iluarsineqarsinnaanngimmata. Ruujorit nutaat 2019-imi aasap ingerlanerani umiarsuarmut siullermut ilaallutik tikissapput, tamatumalu kingorna taarsersuineq aallartinneqarsinnaalissaaq, ineqarnermut naalakkersuisoqarfik tusagassiuutinut nalunaarummi allappoq.
Ukiup affaanik kinguaattoortut
Kinguaattoornerup kingunerissavaa, qimagussorneqarsimasut oktobarimi 2019-imi aatsaat isertersinnaanissaat – naatsorsuutigisamit ukiup affaanik kinguaattoorlutik.
- Kinguaattoortoqarnera utoqqatsinartorujussuuvoq, kisiannili kukkuneq ima annertutigaaq, 2019-imi apriilimi isertertoqarsinnaanani, naalakkersuisoqarfik allappoq.