Innuttaasunik peqataatitsineq: Sermersooq Danmarkimi periuserineqartumik ilaarsiniartoq
Kommuneqarfik Sermersuup Danmarkimi folketingi isumassarsiffigalugu, innuttaasut isumassarsiatik siunnersuutitillu politikkikkut ataatsimiititami suliarineqartalersissinnaavaat, tassa innuttaasoq ikinnerpaamik allanit 250-isinit taperserneqarsimappat.
- Nalinginnaasumik innuttaasut innuttaasunik peqataatitsinermut nittartakkami kommuneqarfiga.gl- imi siunnersuuteqarsinnaatitaapput innuttaasullu allat siunnersuut tapersersinnaallugu. Siunnersuutit ullut 90-it qaangiutsinnagit innuttaasunik 250-inik taperserneqartut ataatsimiititami attuumassuteqartumi suliarineqartussanngorlugit nassiunneqassapput, kommuimi pisortaq Lars Møller-Sørensen Aningaasaqarnermut Inuussutissarsiornermullu Ataatsimiititami politikkerinut saqqummiussissummini nassuiaateqarpoq.
Allat akulerussinnaasut
Innuttaasut internetimut attaveqaateqanngitsut eqqarsaatigineqarsimapput.
- Siunnersuummik tapersiinissamut siunnersuuteqarnissamulluunniit immersugassaq suliarineqassaaq. Immersugassaq najugaqarfinni tamani aaneqarsinnaavoq tunniunneqarsinnaallunilu, taanna allappoq.
Kommunimi pisortap nassuerutigaa, kommunimi najugaqanngitsut allat digitalikkut aaqqissuussamut akulerussinnaanerat.
- Massakkuugallartoq kommuneqarfiga.gl-imik atuisut tamarmik Kommuneqarfik Sermersuumi innuttaasuunersut qulakkeerneqarsinnaanngimmat maluginiaqquneqarpoq, Lars Møller-Sørensen isumannaatsumik isersinnaanerup (login), soorlu Nem-id atorlugu, arlallit nittartakkamik peqataatitsiffiusumik atuisinnaanerannik killilissasoq isumaqartoq erseqqissaavoq.
Misilittagarineqartoq: Oqallinnermik pilersitsisartoq
Aaqqiissutissaq 2018-imi danskit folketinngianni aaqqiissutigineqartumit isumassarsiarineqarpoq. Aaqqiissummi tassani innuttaasut taasisinnaasut tamarmik siunnersuuteqarsinnaapput ullullu 180-it qaangiutsinnagit innuttaasut 50.000-it taperserpassuk siunnersuut qaqinneqassaaq.
Nunani allani, soorlu Danmarkimi USA-milu misilittakkat pillugit kommunimi pisortaq allappoq, ”siunnersuutit qaqutigut inatsisiliortunit akuersissutigineqartartut, sammineqartorlu akuttunngitsumik oqallinnermik pilersitsisartoq”.
Innuttaasunik peqataatitsiniarluni suliniut nutaaq Aningaasaqarnermut Inuussutissarsiornermullu Ataatsimiititap februaarip 18-iani ataatsimiinnerani suliarineqassaaq, kommunalbestyrelsilu inaarutaasumik aalajangiissalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...