Innuttaasunik ataatsimiititsineq: Mittarfik nutaaq pillugu ernumassutit annikitsut
Peqataasoqarluarpoq, kisianni illoqarfiit pingaarnersaanni nutaamik mittarfittaarnissamut suliniummut annertuumik ernumassuteqartoqannginnera, apersuerusussutsip takutippaa.
Mittarfissap nutaap pinngortitamut inunnullu sunniutissaannik allaatiginnittut, Kalaallit Airportsip avatangiisinut sunniutaasinnaasut pillugit nassuiaataannut tusarniaassutigineqartumut peqataaniarlutik, ataasinngornermi unnukkut Katuap ineresuaaraanut inuit 62-t ataatsimiigiarput.
Naammassipallattoq
Innuttaasunik ataatsimiititsineq akunnerni pingsuni sivisussuseqartussatut pilersaarusiorneqarsimagaluarpoq, kisianni akunneq ataaseq affarlu qaangiummat paasissutissiineq aamma apeqqutigineqartut naammassipput.
Suliniummut pisortaq Aviaaja Karlshøj Knudsen Kalaallit Airportsimeersoq peqataasunut tikilluaqqusivoq, innuttaasunullu ataatsimiititsineq avatangiisinut sunniutaasinnaasut pillugit nassuiaammutm Niras Greenlandip suliarisimasaanut taamaallaat tunngassasoq naqissusiivoq. Apeqqutit politikkimut tunngassuteqarsinnaasut oqaluuserissallugit tulluanngitsoq oqaatigineqarpoq.
Mittarfiit pillugit oqallinnermik soqutigisalik Peter Barfoed apeqqutissarpassuaqarpoq, taakku avatangiisinut sunniutaasinnaasunik nassuiaammik aallaaveqarput.
Quassussuaq qanoq annertutigisumik qaartiteriffigineqassanersoq naammattumik erseqqissaassutigineqarsimanngitsoq, taanna isumaqarpoq. Qaartiterinerpassuarnit pujoralammik mingutsitsinerit sisorarfimmut aamma imeqarfimmut tunngatillugu allaaserineqarsimanngimmat tupigusuutigaa.
Imeqarfimmut ulorianartorsiortitsinngitsoq
Nirasimit aallartitap Hans Drejerip naqissuserpaa, Qallussuaq ungasimmat erngup mingutsinneqarnissaanut ulorianartorsiortoqanngitsoq misissuinerit takutikkaat. Sisorarfinnut tunngatillugu Barfoed ilumoornerarpaa.
Sanaartortoqarnerata nalaani mittarfiup ingerlanneqarneranut sanilliullugu nipiliorneq annertunerussasoq, avatangiisit sunnerneqarsinnaanerannut nassuiaammi oqaatigineqarpoq. Mittarfimmi nipiliornerup malunnaateqarpallaanngitsumik annertusinissaa nalilerneqarpoq, ukiunilu qulini tulliuttuni angallannerup marloriaatinngornissaa ilimagineqarpoq.
Mittarfissuup sanilii angerlarsimaannarput.
Suliniummi pisortaq tupaallattoq
- Nipiliornermut akorngusersuinermut tunngatillugu amerlanerusut apeqqutissaqanngimmata tupaallaaatigaara. Innuttaasut mittarfimmut qanittumi najugaqartut tamanna soqutigissagaat ataatsimiinnginnermi naatsorsuutigisimagaluarparput, Aviaaja Karlshøj Knudsen, Sermitsiaq.AG-mut ilisimatitsivoq.
Kalaallit Airports sapaatip-akunnerata siuliani Ilulissani taamatut innuttaasunik ataatsimiititsimmat innuttaasut 50-t peqataapput. Sunniutissanullu nassuiaammut apeqquteqaatit tassani amerlanerujussuupput. Illuaraatillit arlallit mittarfiup illuaqqamut sunniutissaannut ernumassuteqarnertik oqaatigaat. Aammattaaq takornariaqarnerup annertusinerata illoqarfimmut Ilulissanut sunniuteqarnissaa annertuumik ernumassutigineqarpoq.
Avatangiisinut sunniutaasinnaasut pillugit nassuiaammut atatillugu innuttaasut suliniummut maalaaruteqarnissaminnut suli periarfissaqarput, tassami Ilulissani mittarfik pillugu maalaaruteqarnissaq apriilip 5-annut killiliisoqarpoq, Nuummilu mittarfimmut apriilip 3-at killiliunneqarluni.
Avatangiisinut sunniutaasinnaasut pillugit nassuiaatit marluk atuakkit