Innuttaasoq: Tupaallannarpoq taama amerlatigisut tunillatsissimammata
Upernavimmi tunillatsissimasut nutaat 96-it sapaatip akunnerata ingerlanerinnaani paasineqarput. Innuttaasup tamanna tupaallaatigaa, taanna suli akissutisinissaminik utaqqivoq.
Upernavik maanna inuilaarsuartut isikkoqarpoq.
Meeqqat aneerunnaarput, angerlarsimaannarnerulerlutillu. Innuttaasullu pisariaqavissunik suliffillit, soorlu eqqaavilerisut, pisiniarfinni aamma peqqinnissaqarfimmi sulisuunerusut suliartorlutik kisimik anisarput.
Jan Kleinschmidt Upernavimmiit nunaqarfinnut sapaatip akunnerata naanerani angallassissalluni ullaakkut aallarpoq. Upernavimmut unnoqqaakkut tikikkami illoqarfik tikiffigisaa allarluinnaavoq.
- Upernavik tikiffigalugu, soorlu inoqanngitsoq, assut eqqumiippoq. Inoqaranilu biilinilluunniit ingerlaartoqannginnami. Tassa angerlarsimarrapput. Ilami Upernavimmiut tamakkerluta tunillatsissimasunut qanillivallaarsimavugut, Jan Kleinschmidt oqaluttuarpoq.
Upernavimmi marlunngorneq ilanngullugu tunillatsissimasut nutaat katillugit 96-it paasineqarput. Tassa Upernavimmi eqqaanilu innuttaasut 5 procentii. Misissortissimasullu 20 procentii tunillatsissimallutik.
Periuseq nutaaq toqqissisimanarpoq
Naalakkersuisut marlunngornermi unnukkut nalunaaruteqarput Upernavimmi eqqaanilu peqqinnissaqarfiup coronamut akiuiniarnermini periusini allanngortikkaa.
Misissuinerit akiuussutissalersuinerillu tunulliunneqarallassapput, innuttaasut tamarmik tunillatsissimanngikkunik tunillatsissimasumut qanillivallaarsimasutut naatsorsuutigineqartariaqarmata. Taamaattoq napparsimanerusut peqqinnissaqarfimmit sullinneqarnissaat maanna salliunneqalerpoq.
Tamanna toqqissisimanartoq, Jan Kleinschmidt oqaluttuarpoq. Taamaattoq allamik ernumagisaqarpoq:
- Upernavimmi akiuussutissalertissimasut amerlasoorsuugaluartugut, taamaattoq suli arlaqarpoq akiuussutissalertissimanngitsunik. Taamaammat ernumanarpoq peqqinnissaqarfipput artukkerneqalersoralugu, arlallit uninngasariaqalissappata, oqarpoq. Taanna akiuussutissalertissimavoq, maannalu misissortereerluni akissutissaminik ullup aappassaa utaqqivoq.
Tunillatsissimasut sumiissimasunuku
Taassuma tupaallaatigaa tunillatsissimasut taama amerlatigimmata. Nammineerluni nulianilu ilisarisimasaqarput sapaatit akunneri kingulliit marluk pingasut iluanni peqqinnissaqarfimmut misissortikkumasarsimasunik, itigartinneqartarsimasunilli.
- Annilaarnarpoq taama amerlatigisut tunillatsissimasut paasigatsigit. Ilisimajuarsimavarpulli tuniluunneq taamaalluni takkukkumaartoq. Tunillatsissimasulli taama amerlatigitillugit peqqissaavipput taama mikitigisoq, innangavissallu taama ikitsigisut eqqarsarnartoqarpoq ernumaammernalaarlunilu, Sermitsiaq.AG-mut oqarpoq.
Avannaani nunap immikkoortortaqarfiani nakorsat pisortaat Peter Vedsted Upernavimmi peqqissaaviup misissuinissamik itigartitsisarsimaneranik oqaatiginnittoqarnera siusinnerusukkut akerlilereerpaa.
