Innuttaasoq piterarnera pillugu: Akunnattumik sakkortussuseqarpoq
Politiit qatserisartullu sapaatip unnuaani piterarneranut atatillugu Tasiilami sianerfigineqanngillat. Piteraq akunnattumik sakkortussuseqartumik misigisimallugu, illoqarfimmi innuttaasoq oqaluttuarpoq, illoqarfimmilu apummik taamaallaat teqqaatitsivoq. DMI-p anoraasuarnerit sekundimut 40 meterisut sukkassuseqartut nalunaarsorsimavai.
Tasiilami ullaassap ingerlanerani piterarneranut atatillugu nalunaarutit siulliit naapertorlugit annerusumik ajoqusertoqarsimanngilaq.
Politiit qatserisartullu anorersuarneranut atatillugu pisunik oqaatigisarialinnik ilisimatinneqarsimanatik, Sermitsiaq.AG-mut ilisimatitsipput.
- Ajornartorsiuteqanngilagut. Igalaanik imaluunniit allanik aserortoqanngilaq, Hans Kuitse illoqarfimmi qatserisartuneersoq oqaluttuarpoq. Kalaallit Nunaanni Politiini pigaartuni pisortaq Carl Sværd, silarlunneranut atatillugu sianerfigineqarsimanani ilisimatitsivoq.
Illoqarfik taamaalilluni siorna septembarimi piterarnerani illoqarfimmi aseruatitertoqarneranit eqqugaannginneruvoq. Taamani innuttasut arlallit inissiaminnit qimagutsiterneqarput, igalaat aserorsimanerat pissutigalugu.
Persualaneq
Thomas Ørum Kristensen Tasiilameersoq piterarnerit amerlasuut misiginikuuai, unalu akunnattumik sakkortussuseqarnerarpaa:
- Nalunaaqutaq 05.30-mit 06.00-mut sakkortunerpaavoq, ajorpallaanngilaq. Piteraq akunnappoq. Aputeqarluaratta persualavoq.
- Aput ippassaani nakkaasoq maanna peerpoq. Aqqusinerni arlalinniilersimavoq, kisianni aputaajaasoqarpoq. Biilinik angalaaqqammerpunga, ajorpasinngilarlu, Thomas Ørum Kristensen oqaluttuarpoq.
Qulip missaanilu anori sakkukilliartulersoq, taanna oqarpoq.
DMI: Anoraasuarsuarmit sakkortuneq
DMI-p piteraq nalunaarsorsimavaa, ilaatigullu ima allaaserisaqarpoq:
- Sapaatip unnuaani anori takkuppoq, nal. 05 aamma nal. 07 akornanni sakkortunerpaalluni. Anori sakkortunerpaammat 27 m/s-imut nalunaarsorneqarpoq, anoraasuarnera 40 m/s-inik sakkortussuseqarluni, tassa anoraasuarsuarmit sakkortunerulluni.
- 16-inik issppoq – kisianni anoraa ilanngukkaanni 32-t missaanni issinnera misinnassaaq. Sapaatip ingerlanerani anori sakkukilliartussaaq.