Innovationip pisortaata Nitter isornartorsiorpaa

Jacob Nitter Sørensen Qaqortumi timmisartoqarfiup naannerusumik mittarfeqartinneqarniarneranik naammagisimaarinnikkami anguniagaqarsimanngilaq, taamatut oqarpoq innovation South Greenlandip pisortaanera Allan Chemnitz.

Kujataani atlantikup avannaani timmisartoqarfissap mittarfissaa soorunami 1500 meterisut takissuseqassaaq, taamaanngippat tatiginnittoqaranilu asuli neriorsuisoqarsimassaaq.

Innovation South Greenlandimi pisortaaneq Allan Chemnitz naatsumik taamatut oqarpoq.

Jacob Nitter Sørensen oqarami, mittarfik 1199 meterisut imaluunniit 1499 meterisut takissuseqarnissaa Air Greenlandimut apeqqutaanngitsoq, taava Air Greenlandip soqutigisai kisiisa tunngavigisimassavai, tassanu Nuuk aqqusaarlugu angallannerit tamarmik ingerlanneqartarnissaat soqutigineqarami, Allan Chemniz oqarpoq.

AAMMA ATUARK: Nitter: Qanoq mittarfiup takissuseqarnera apeqqutaanngilaq

- Kalaallit Nunaata tamarmiusup ineriartortinneqarnissaanik anguniagaqaraanni, Kujataata inissisimaffia piffissaq ungasinnerusoq eqqarsaatigalugu Kalaallit Nunaannit Islandimut, Cnadamut USA-mullu aqqutit pitsaanerujussuanngussasut takuneqarsinnaassaaq.

- Jacob Nitter Sørensen angallannermi aqqutinik allannguisoqarnianngitsoq oqarami, taava aaqqiissutissanut ilaanani ajornartorsiutinut ilaavoq. Tunniusserusunngilarmi, Kalaallillu Nunaanni attaveqaativut Air Greenlandip anguniagaanut taamaallaat naleqqussarusuppai, Allan Chemnitz oqarpoq.

1500 meteriunissaa annertuumik sulissutigineqarsimasoq

Jacob Nitter Sørensenip ataasinngormat oqaatigaa, Kujataani timmisartoqarfissap mittarfissaata takissusissaa Air Greenlandimut sunniuteqarnavianngitsoq:

- Nuummit timmisartorsuarnut mittarfissaq aqqutigalugu Kujataanut angallassisarnissaq pilerinartuutillugu neqeroorutiginiarparput. Mittarfik 1500 meterisut imaluunniit 1199 meterisut takitigingaluarpalluunniit sullitatta, Qaqortumiit Københavnimut nalunaaquttap akunnerini arfinilinniit arfineq-marlunnut ingerlaartarnissartik naatsorsuutigisinnaavaat, Air Greenlandimi pisortaaneq Jabok Nitter Sermitsiaq.AG-mut oqarpoq.

Allan Chemnitzip taamatut oqaaseqartoqarnera isumaqatiginngilluinnarpaa, oqaatigalugulu mittarfiup 1500 meterisut takissuseqarnissaanip piareersaanermi annertuumik suliaqartoqarsimasoq:

- Innovation South Greenlandimi mittarfissap 1499 meterisut takissuseqarnissaa ukiuni marlunni pilersaarusiorsimavarput. Kujataani inuussutissarsiutinik ineriartortitsineq Air Greenlandip pisortaaneranit aqunneqassappat, Innovation South Greenlandip pisortaaneratut oqaatigisariaqarpara, tamatuma Kommuni Kujallermut qanoq ilungersunartigisumik kingunerluuteqarsimanera maluginiaqqullugu.

Nitter: Angallannerup ataatsimoortinneqarnera tamanut iluaqutaassaaq

- Politikkerit nunallu timmisartuutileqatigiiffiata sumiginnaqqippaatigut, Allan Chemnitz oqarpoq.

Innovation South Greenlandimi pilersaarutigineqartut ukiup 2030-p tungaanut atuuttussatut naatsorsuutigineqarpoq. Anguniagaavoq Kujataata nunap sinneranut naapertuuttunngortinneqarnissaa, taanna oqarpoq.

- Nuna Qaqortumisut, Sisimiunisut, Ilulissanisut aap soorunami aamma Nuummisut ineriartortinneqartariaqarpoq, Allan Chemnitz oqarpoq.

Jacob Nitter Sørensenip sisamanngormat Sermitsiaq.AG-mut oqaatigaa, angallannerit tamarmik Nuummut katersuunneqarnerat iluaqutissartarpassuaqassasoq:

- Angallannerit tamaasa Nuummut katersuunneqarpata Air Greenland Nuummut, Kalaallit Nunaata sinneranut nunanullu allanut akulikinnerusumik sivikinnerusumillu angalasoqartarnissamik neqerooruteqartalissaaq.

- Tamatuma aamma malitsigisaanik Nuummut aqqutit nutaat atorlugit angalasut ullumikkornit sukkanerujussuarmik Kujataanukarsinnaalissapput. Taamaammat upperaarput Kujataani ullumikkut angallannikkut ajornartorsiuterpassuusartut aaqqiiffigisinnaallutigit, Jacob Nitter Sørensen oqarpoq.

Allan Chemnitzip ilanngutassiaa takinerusoq, sapaatip akunnerani matumani Sermitsiami aqangu saqqummersussami atuaruk.

Powered by Labrador CMS