Inngerutip versia tulleq oqallisigilerpaat

Kulturip illorsuani Katuami maajip naanerani katuarpalaartoqassaaq. Tassani qilaatersortartut 20-25-it naapeqatigiissapput qilaatersortartut Nunatsinni naapeqatigiinnerisa annersarisassaanni. Qilaatersortarnerup siunissaa pingaarnertut sammineqassaaq.

Qilaatersortartut Leif Immanuelsen, Anda Poulsen, Varna Nielsen aamma Ari Poulsen Rasmussen qilaatersortarnerup oqaluuserinissaanik pilersaarusiortuupput tamannalu maajip 27-aniit pissaaq.

- Ilaatigut oqaluuseriniarparput siunissami qilaat qanoq atorniarnerlugu. Nalunngilarput qilaatersorneq qanga aalajangersimaqqissaartunik siunertaqartumik atorneqartartoq. Kulturikkut kingornussarput taanna attatiinnarusupparput aammali ersarissumik siunertalimmik tamanna anguniarusupparput, Leif Immanuelsen oqarpoq.

Isumasioqatigiinnissami Qaanaamiit, kitaaniit, kujataaniit tunumiillu peqataasoqassaaq. Isumasioqatigiinnermi qilaatersortoqangaatsiassaaq misilittakkanillu paarlaasseqatigiittoqassalluni.

Ukiut 300-ut uninnganeq
Ukiut arlallit matuma siorna Leif Immanuelsen qilaatersorneq ilikkarpoq misilittagaqarlualersimallunilu

- Qilaatersorneq ilaatigut atorneqarsinnaavoq inunnut allanut saqqummiussinissamut sungiusaatitut. Nalunngilara qilaatersortartut arlallit allanut qilaatersoqqaarneq killissanik qaangiinertut misigisaraat. Taama pisoqaraangat inuttut ineriartornermi annertoorujussuarmik alloriartoqartarpoq, Leif Immanuelsen oqarpoq.

Avanersuarmi tunumilu qilaatersoriaatsit assigiinngitsuupput. Kitaanili periuseq puiguinnarneqarsimasutut ippoq.

- Qujanaqaaq avanersuarmi tunumilu qilaatersorneq ingerlaannarsimammat. Kitaanili qilaat ukiut 300-ut toqungasutut issimavoq kitaanilu qilaatersoriaasiusimasoq ilisimaneerussimagunarpoq. Itsaq immiussisoqarsimagaluarpoq tassanili qanoq katuarnersut tusaajuminaappoq, Leif Immanuelsen oqarpoq.

Isumasioqatigiinneq immiunneqassamaarpoq piviusulersaarutit ilusilerlugu suliarineqartussamik.