Innersuussisoqaraluartoq: Benziinamut akiliutip atorneqarneranut malittarisassaqanngitsoq

Benziinamut akiliutip atorneqarneranut malittarisassanik atuutsitsilernissamut Naalakkersuisunut ersarissumik kaammattuutigineqaraluartoq, taamaalilluni atornerluineq annikillisinneqassammat, taamaaliortoqarsimanngilaq.

Novembarimi 2017-imi kukkunersiuisup pisortanit akuerineqartup Bo Colbep, Doris J. Jensenip benziinamut akiliutaanik misissuinini naammassivaa, taanna inummit allamit inoqutigiinneersuunngitsumit angallammut orsiutigineqartarsimavoq.

Innersuussut

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut nalunaarusiami kukkunersiuisup oqaatigaa, ‘’orsernermut akiliutinik atuinermut sinaakkutinik aalajangersaasoqarnissaa isumaliutigineqartariaqartoq, Naalakkersuisunut akiliutit allat tunniunneqartartut assigalugit’’.

Nalunaarusiaq innersuussummik imaqartoq, naalakkersuisoqarfimmi pisortamut Lone N. Møllerimut, ulloq 18. november 2017 nassiunneqarsimavoq.

Doris J. Jensenip qanittukkut paasissutissiissummi paragraf 37 naapertorlugu akissutikkut ilisimatitsissutigaa, ilaatigut Deloittep misissuinerata inernerinik arlaqartut paasitinneqarsimasut.

Kielsen paasitinneqartoq

- Aammattaaq suliaq pillugu Naalakkersuisut Siulittaasuannut Naalakkersuisunullu ilisimatitsissuteqarpunga, taassuma paasissutissiinerani tamanna atuarneqarsinnaavoq, tassani aamma atuarneqarsinnaavoq kukkunersiuinermut ataatsimiititaliaq ilisimatinneqarsimasoq.

Suliaq ilungersunaraluartoq, aamma pissut immikkuullarikkaluartut, assersuutigalugu Doris J. Jensenip benziinamut akiliutini kodialu biiliniitissimagai, Namminersorlutik Oqartussani – ukioq ataaseq qaangiuttorlu – benziinamut atuinermut sinaakkutinik malittarisassanik pilersitsisimanngillat, taamaalilluni siunissami akileraartartut aningaasaataannik atornerluineq annikillisinneqarniassammat.

Naalakkersuisut Siulittaasoqarfiani pisortaq Søren Hald Møller, Sermitsiaq.AG-mut ilisimatitsivoq, ‘’ataatsimut aamma qitiusumik orsernermut akiliutinik aamma akiliutinik allanik atuinermut malittarisassanut tunngatillugu, naatsorsuuserisoqarfitsinnut Aningaasaqarnermut Sulisoqarnermullu Aqutsisoqarfimmiittumut innersuussisariaqarpunga’’.

Aqutsisoqarfimmi suliaq ilisimaneqanngitsoq

Aningaasaqarnermut Sulisoqarnermullu Aqutsisoqarfimmi pisortaq, Lise Lennert Olsen, benziinamut akiliut pillugu suliaq paasissutissartaalu ilisimasaqarsimanani, Sermitsiaq.AG-mut ilisimatitsivoq.

- Benziinamut akiliutit atorneqarnerinut tunngatillugu malittarisassanik aalajangersaanissamut maanna isumaliutersuuteqarnissaq kajuminnarsivoq, Lise Lennert Olsen, Bo Colbep innersuussutaanik ilisimatinneqarsimanngitsoq taama oqarpoq.

- Maani Aqutsisoqarfimmi suliaq suli oqaloqatigiissutiginngilarput, kisianni oqaluuserissavarput, taanna Sermitsiaq.AG-mut naqissusiivoq.

Benziinamut akiliutip atornerlunneqarnera pillugu allaaserisat tamaasa atuakkit: UNA TOORUK

Powered by Labrador CMS