Innarluutillit sapaatit akunnerat: Nakkaakkiartorluni inissisimaneq
Inunnut innarluutilinnut atugassarititaasut pillugit nalunaarusiami eqqarsariaammernartumi nutaami taqqakkut milittoornermik eqqugaagaanni qanoq pisoqarsinnaaneranik atuartartut pingaarutilimmik paasisaqartinneqarput.
Atuagaq killitsinnartorujussuuvoq.
Amerlanerpaat inunnut innarluutilinnut atugassarititaasut pillugit nalunaarusiaq, nutaaq Nuummi katersortarfimmi – innarluutilinnut sapaatip-akunnerani 41-mi sapaatip-akunneqartitsineq nalerorlugu, tamanut saqqummiunneqartoq atuareerlugu taama misigissuseqarsimapput.
Aviisi AG taama allappoq.
Nalunaarusiaq Ilulissani upernaaq 100-t sinnerlugit peqataaffigineqartumik »Inuk qitiutillugu« qulequtaralugu isumasioqatigiinnermik inuit innarluutillit illersuisoqarfiannit Tiliumit tunuliaqutaaffigineqartumik aallaaveqarpoq.
Isumasioqatigiinnermi tassani 29-nik ukiullip Niels Skiftep, Maniitsumeersoq, oqaluttuassartani killitsinnartoq oqaluttuaraa, taannalu narlunaarusiami »Takorluukkat piviusunngorsinnaapput«-mik qulequtaqartumi oqaluttuareqqinneqarpoq. Taanna ilinniartitsisunngorniarnermini aanaartoornermik eqqugaavoq. Tamatuma kinguneranik pisussinnaajunnaarpoq oqalussinnaajunnaarlunilu.
Niels Skiftep nalunaarusiami pissutsini ilungersunartorujussuarni imminiigaaneq oqaluttuaraa. Nakkaakkiartorpoq aaqqissuussaanermillu sapanginneqarluni. Kisimiilluni Rigshospitaliliartitaavoq. Pisussinnaanani oqalussinnaananilu. Kalaallit Nunaannut uteqqikkami arlalinnik aporfissalersorneqarpoq allamillu ikiorserneqarniarnani taamaallaat siusinaartumik pensionisiaqalernissamut periarfissamik. Taamaaliorusussimanngilarli. Sungiusaqqinneqarusuppoq inuiaqatigiinnilu akooqqilerusulluni. Tamannalu maani nunatsinni pisinnaanngimmat, taamani aapparisani Danmarkiliaqatigaa Jyllandip avannaani Taleinstituttet aamma Hjerneskadecenter qanillillugit. Tassani ukiup ataatsip missaani sungiusaqqippoq.
- Danmarkimi siuariartortorujussuuvunga. Kajumissuseqarnera annerulerpoq. Inoorussusera annerulerpoq. Nukittunerulerpunga, Niels Skifte, nukimminik oqalussinnaassutsiminillu suli tamakkiisumik pigisaqaleqqissimanngitsoq, oqaluttuarpoq. Kalaallit Nunaanni najugaqaqqilersimavoq, maannalu piumanngisaraluaminik inissisimaffeqalersimalluni: siusinaartumik sulisinnaajunnaarnersiutilik.
Aviisimi AG-mi atuarnerusinnaavutit. Aviisi uani pissarsiariuk:
