Innarluutillit samminerulerlugit
Innarluutillit atugaasa sammineqarnerulernissaannik nalunaarut isumallualersitsivoq neruuteqalersitsillunilu, Kalaallit Nunaanni Inuit Pisinnaatitaaffii pillugit Siunnersuisoqatigiit siulittaasuat Hjalmar Dahl isuamqarpoq
Inuit pisinnaatitaaffiisigut, pingaartumillu innarluutillit pisinnaatitaaffiisigut unammilligassaqaqaaq.
– Assersuutigalugu ullutsinni tulisartortatsinnut atugassarititaasut unammillenartoqaqaat. Tusilartortatta ullumikkut ajornartorsiutigisaat ilaatigut tassaapput, nutaarsiassanik soorlu radiukkut TV-kullu tamakkiisumik malinnaasinnaanginnerat, pisortaqarfinnullu saaffiginninniarunik ussersuutinik paasinnissinnaannginneq pissutigalugu aatsaat nutserisinnaasunik ilaqarlutik saaffiginnisinnaaneq. Napparsimalersimagunik oqarasuaatikkut nakorsamut piffissamik inniminniiniarunik aatsaat tusaasinnaasumik ikiortileqqaarlutik nakorsamut saaffiginnissinnaaneq. Minnerunngitsumik ilinniagaqarnissamut pikkorissarnissamullu periarfissakippaallaarneq aammalu sulerusussuteqaraluarlutik suliffeqarfinnit tunuarsimaarfigineqartarnerat ajornartorsiutit annertuut ilagivaat.
Taamatut oqarpoq Kalaallit Nunaanni Inuit Pisinnaatitaaffii pillugit Siunnersuisoqatigiit siulittaasuat Hjalmar Dahl, taassumalu nunnaarutigaa Naalakkersuisut siulittaasuata Aleqa Hammondip ulluni siullerni 100-ni Naalakkersuisunut siulittaasuunerminut atatillugu nalunaarutigimmagu innarluutillit atugarisaat sammineqarnerulissasut.
– Tusilartortatta pisinnaatitaaffiinnik pitsanngorsaanissarput pisariaqarluinnartoq qulaani assersuutit takutippaat. Tamakkiisumik isigalugu nunatsinni timikkut tarnikkullu innarluutilittatta pisinnaatitaaffiinnik annertuumik pitsanngorsaasoqarnikuuvoq. Taamaakkaluartoq suli unammilligassanik annertuunik peqarpoq, Hjalmar Dahl erseqqissaavoq, isumaqarporlu innarluutillit pisinnaatitaaffii pillugit piffissamut sivikitsumut sivisuumullu iliuuseqarnissamik pilersaarusiornissaq pisariaqartinneqartoq.