Innarluutillit pillugit nalunaarusiaq nutaaq

Inuit Pisinnaatitaaffiinut Kalaallit Nunaata Siunnersuisoqatigiivisa, Kalaallit Nunaanni inuit pisinnaatitaaffiisa nakkutiginissaannutt, siuarsaaviginissaannut illersornissaannullu siunertaqartoq, Naalagaaffiit Peqatigiivisa Inuit Innarluutilinnut Isumaqatigiissutaanik Kalaallit Nunaat qanoq annertutigisumik atuutsitsinersoq pillugu nutaamik nalunaarusiortitsisimavoq.

Nalunaarusiaq, Inuit Pisinnaatitaaffiinut Kalaallit Nunaata Siunnersuisoqatigiivisa oqarnerat naapertorlugu Kalaallit Nunaanni inatsisinik Naalagaaffiit Peqatigiivisa Inuit Innarluutilinnut Isumaqatigiissutaannut sanilliullugu inatsisilerinikkut misissuineruvoq.

Nalunaarusiap ilaatigut imaraa, qanoq pisortaqarfiit sulianik aalajangiisartut aalajangiigaangamik, innuttaasut pisinnaatitaaffiinik nunat assigiinngitsut akornanni pisinnaatitaaffiusunik innimittartarnersut, siunnersuisooqatigiit tusagassiuutinut nalunaarumminni ilaatigut taama allapput.

- Tamanna Inuit Pisinnaatitaaffiinut Kalaallit Nunaata Siunnersuisoqatigiivisa sulineranut tunngaviuvoq pitsaasoq, tassami Siunnersuisoqatigiit allallu inuit innarluutillit pisinnaatitaaffiinik suliaqartut Kalaallit Nunaanni inuit innarluutillit ajornartorsiutaannik tamakkerlugu isiginninnermik tunisinnaammagit, Inuit Pisinnaatitaaffiinut Kalaallit Nunaata Siunnersuisoqatigiivisa siulittaasorigallagaat, Inge Olsvig Brandt taama oqarpoq.

Naluaarusiaq nalunaarusiat immikkoortut pingasut aappassaraat, taakkunanilu inuit pisinnaatitaaffii malinneqarnersut sammineqarput.