Innarluutillit kattuffiat: Aaqqissuussaaneq pitsaanerpaajunngilaq
Innarluutilinnik sullissineq qitiusumik aqunneqartariaqartoq Innarluutillit Kattuffiat isumaqarput
Innarluutillit atugaannut atatillugu sullissineq qitiusumit ingarlanneqartariaqartoq Nunatsinni Inuit Innarluutillit Kattuffiat isumaqarpoq.
Tiliumut saaffiginnissutaannik nalilersuinerup saqqummersinneqareernerani kattuffik taama isummerpoq.
- Innuttaasut saaffinissutaat pillugit naliliinerata inerniliineratalu imarisaanut Innarluutillit Kattuffiannit, NIIK-imit, ajoraluartumik tupaallanngilaq, kattuffimmi siulittaasoq Anders Meilvang tusagassiutinut nalunaarummi oqarpoq, nangillunilu:
- Ukiuni arlalinngortuni taamaassimavoq, Tilioq-mullu saaffiginnissutit imarisaasa amerlassusaasalu naliliinerput malillugu takutippaat ullutsinni aaqqissuussaaneq pitsaanerpaajunngitsoq.
Innarluutilinnik sullisinerup qitiusumik aqunneqalernissaa kattuffimmit siunnersuutigineqarpoq.
- Nunatsinni ilaasortatsinnit attaveqartarnitsinni tusartakkagut Tilioq-p naliliineratigut saqqummertunut assigupput. Naliliinermi atuarneqarsinnaavarput Tilioq-mut saaffiginnissutit nalunaarsorneqartut amerlanersaat tassaammata Kommunet ullumit akisussaaffigisaannut tunngasut. Tamatuma takutippaa susassaqarfik akisussaaffillu annertoorujussuaq Kommunenit kivinneqarsinnaanngitsoq, tamatumalu kingunerisaanik inuppassuit inuunerat siunissaallu pitsaanngitsumik sunnerneqartoq. Tamannalu assut uatsinnik ernumatsitsivoq, Niels Meilvang oqarpoq.