KL

DK

Innarluutillit Kattuffianni siulittaasoq: – Innarluutilinnut illersuisoq nutaaq utaqqikatapparput

Christina Johnsen inuit innarluutillit illersuisuattut apriilip qiteqqunneranili taamaatippoq, maannali aggustip naalernerani taartissaanik suli atorfinitsitsisoqanngilaq. Tamanna Nunatsinni innarluutillit peqatigiiffiinit pakatsissutigineqarpoq

Christina Johnsen apriilip qeqqani tunuarmalli inuit innarluutillit illersuisuannik nutaamik suli toqqaasoqanngilaq.
Aaqqissuisoqarfik

Paasisat

Inuit innarluutillit illersuisuat aamma inatsisit naapertorlugit suliassat

Inuit innarluutillit illersuisuata suliassaraa, inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaat aallaavigalugu inuit innarluutillit inuiaqatigiinni soqutigisaasa qulakkeerneqarnissaat siuarsarneqarnissaallu. Inuit innarluutillit illersuisuata ataatsimut isigalugu suliassai ilaatigut tassaapput:

- Inuit innarluutillit pisinnaatitaaffiinik aamma maalaarutaanik aqqutissaannik siunnersorlugit aqqutissiuullugillu.

- Pisortat aamma namminerisamik sulliviutillit siunnersorlugit aqqutissiuullugillu.

- Naalagaaffiit Peqatigiit inuit innarluutillit pillugit Isumaqatigiissutaat naapertorlugu inatsisitigut isumannaatsumik inuit innarluutillit sullinneqarnerat qulakkiissallugu

- Pissutsit inunnut innarluutilinnut tunngasut nalilersussallugit

- Nunatsinni inunnut innarluutilinnut tunngasunik paasissutissanik katersineq ingerlatitseqqinnerlu

- Inuit innarluutillit atugarisaat nakussassarlugit suliniutinik siunnersuusiorneq

- Nunatsinni innarluutillit peqatigiiffii suleqatigalugit inuit innarluutillit Kalaallit Nunaanni atugaat siuarsarneqarnissaat qularnaarneqarnissaallu

Inuit Innarluutillit Illersuisuat politikkikkut attuumassuteqarfeqanngilaq, inuit ataasiakkaat pillugit aalajangiisinnaatitaanngilaq, oqaaseqaateqarsinnaatitaallunili.

Christina Johnsen Kalaallit Nunaanni inuit innarluutillit illersuisuisa siullersaraat 1.november 2017-imiit 31.maj 2021-mut atorfeqartoq.

Najoqqutaq: tilioq.gl

Siusinnerusukkut innarluutillit illersuisuata Christina Johnsenip tunuarneranit maanna qaammatit sisamat qaangiunneranni, qaqugu nutaamik innarluutilinnut illersuisoqalissanersoq suli tamanut nalunaarutigineqanngilaq. Tamanna NIIK-mit, Nunatsinni Inuit Innarluutillit Kattuffiannit qatsulluinnarneqarpoq, utaqqisitsinerlu pakatsissutigineqarluni.

Taama aviisi Sermitsiaq allappoq.

Innarluutillit peqatigiiffiinit innarluutillit illersuisuat qanittumik suleqatigigatsigu, aamma malugisinnaasatsitut Tiliumik innarluutilinnullu illersuisumik qanittumik suleqateqarnerput maanna amigaatigaarput, Nunatsinni Inuit Innarluutillit Kattuffianni siulittaasoq Cecilie Marie Jakobsen Sermitsiamut oqarpoq, taanna maajimi siulittaasunngorpoq.

NIIK-mit innarluutilinnut illersuisutut atorfiup inuttaleqqinneqarnissaa utaqqivarput, nangilluni oqarpoq.

Taassuma aamma maluginiarpaa, innarluutilinnut illersuisutut atorfiup inuttassarsiuunneqarnera, siusinnerusukkut innarluutilinnut illersuisuusimasup Christina Johnsenip taamaatinneranut naleqqiullugu, kingusissorujussuakkut saqqummiunneqartoq. Meeqqanut Inuusuttunullu Naalakkersuisoqarfiup, innarluutilinnut illersuisumik toqqaasussaasup nalunaarutigaa, atorfinitsitsiniarluni sulineq ingerlasoq, Naalakkersuisoqarfimmillu neriuutigineqartoq, qanittukkut tamanut nalunaaruteqarsinnaajumaarlutik

Tusilartunut nutserisarneq

NIIK-mit Naalakkersuisunut allagaqarsimapput kajumissaarlugillu, tusagassiortunut katersortitsigaangamik tusilartunut nutserinermik atuisaleqqullugit, taamaalilluni inuit tusaaniarnermikkut innarluuteqartut nalunaarutigineqartunut malinnaasinnaaniassammata. Tamanna ingammik Naalakkersuisut piffissami matumani coronamut tunngasunik akuttunngitsumik tusagassiuutinut katersortitsisarneranni pingaaruteqarmat. Tamakku malinnaaffiginissaat tamanut pingaaruteqarmat, tusilartulli malinnaasinnaanissaminnut periarfissaqaratik.

Allaaserisaq tamaat Sermitsiami sapaatip-akunnerani saqqummersumi atuaruk. Uani pissarsiarisinnaavat:

nunatsinnit inuiagatigiit politikki
Powered by Labrador CMS