Innarluutillit illersuisuat: Tarnimikkut nappaatillit arlallit angerlarsimaffeqanngitsuupput
Innarluutillit illersuisoqarfiat Tilioq ilaqutaasunit saaffigineqartuartarpoq oqaluttuartunik ilaqutartik tarnimigut napparsimasoq angerlarsimaffeerussimasoq.
Sapaatit akunnerani qaangiuttumi Sermitsiami normu 44-mi arnaq inuusuttoq tarnimigut nappaatilik aviisip allaaserisaa, Dronning Ingridip peqqissaaviani tarnikkut nappaateqartunut immikkoortortamut unitsinneqarnermi kingorna angerlarsimaffeerussimasoq, unnuisarfimmut Kialaarfimmut innersuunneqarluni kommuni inissaanik innersuussisinnaanngimmat.
Aviisi Sermitsiaq taama allappoq.
Ajoraluartumik tamanna kisiartaanngilaq, Innarluutillimmi Illersuisoqarfiat Tilioq inunnit tarnimikkut nappaatilinnut ilaqutaasunit saaffigineqartuartarpoq, oqaluttuartarpullu ilaqutartik tarnimigut napparsimasoq angerlarsimaffeqanngitsoq, nalullugulu qanoq iliussanerlutik, kommuni ikiuerusunngimmat, taamaallaallu unnuisarfik Kialaarfik innersuullugu.
– Tarnikkut nappaateqaraanni unnuisarfimmut innersuunneqarneq ajornerpaavoq. Tiliumi aamma taamaattunik saaffigineqartarnerput alianaqaaq. Kipiluttunartupilussuuvoq. Taamaattorli inissaminnik neqeroorfigineqaraangata arlalissuartigut inissaat ajortupilussuusarpoq. Inunnut tarnimikkut nappaateqartunut ataatsimoorluni najugaqarfiit pitsaanngitsuupput pisoqaaqalutillu, amerlasuutigut pitsaanngitsunik avatangiiseqartarlutik, innarluutillit illersuisuat Christina Johnsen aviisimut Sermitsiamut oqarpoq.
Aviisimi Sermitsiami atuarnerusinnaavutit. Aviisi uani pissarsiarisinnaavat: