Innarluutillit illersuisuat: Aningaasat naammanngillat
Innarluutillit illersuisuata Anja Hynne Nielsenip oqaatigaa, aningaasat aningaasanut inatsimmi immikkoortinneqarsimasut, suliassat illersuisoqarfimmit inatsit malillugu naammassineqarnissaannut amigarluinnartut.
3,6 millioner koruunit aingaasanut inatsisitigut Tilimut immikkoortinneqarsimasut taamaallaat aningaasarsianut ingerlatsinermullu atorneqarsinnaasut, innarluutillit illersuisuata Anja Hynne Nielsenip tusagassiorfitsigut nalunaaruteqarnermi oqaatigaa.
Politikkut nalunaarutigineqarsimasut naalakkersuisooqatigiittullu atsiorsimasut malillugit Tilioq aningaasaqarnikkut ullutsinnut naapertuutsinneqalertussaagaluartoq, tamanna pisimanngitsoq, taassuma oqaatigaa.
- Naleqqap aamma Inuit Ataqatigiit Naalakkersuinikkut isumaqatigiissutigisimasaanni Tiliup aningaasaqarnera naapertuuttunngortikkumallugu siunertaqartoqaraluarpoq inuit innarluutillit atugaat pitsanngorsarumaneqarnikuugaluarput. Maanna naalakkersuisut isumaqatigiissutaanni inuit innarluutillit oqaatsimik ataatsimilluunnii eqqaaneqanngillat.
Oqaaserineqarsimasut iliuuseqarfigineqarsimanngitsut
Naalakkersuisut nuna tamakkerlugu iliuusissatut pilersaarusiorput, tassani Kalaallit Nunaata inuit innarluutillit pisinnaatitaaffii pilluugit FN-imi isumaqatigiissummik malinninnissaa qulakkeerniarneqarluni.
2023-mulli aningaasanut inatsisissatut siunnersuummi takuneqarsinnaanngilaq, oqaaserineqarsimasut iliuuseqarfigineqarnissaannut pilersaaruteqartoqarnersoq, tamannalu pakatsinartoq, Anja Hynne Nielsen oqarpoq.
Innarluutilinnut illersuisoqarfimmi suliassat inatsisitigut pituttugaasut arlallit aningaasaateqarfiit aningaasaliissuteqarnerisigut ullumikkut naammassineqartartut, taanna ilisimatitsivoq.
- Isumalluutinik atuinartupilussuuvoq, qularnarluni aamma imminut attassinnaanngilaq. Tiliumut aningaasanut inatsit aqqutigalugu aningaasaliissutaasartut akissarsianut ingerlatsinermullu taamaallaat naammattarput, tusagassiorfitsigut nalunaaruteqarnermi oqaatigineqarpoq.
Aningaasaateqarfimmit aningaasaliiffigineqarsimasoq
Tilioq ukiuni kingullerni millioninik millionilluunniiit affaanik aningaasaateqarfinnut qinnuteqartariaqartarpoq inatsisitigut suliassat naammassisinnaajumallugit. Soorlu inuit innarluutillit illersuisuat pillugu inatsimmi §7 naapertorlugu pisortat, soqutigisaqaqatigiit, kattuffiit aamma peqatigiiffiit ukiumoortumik naapisinneqarnissaannut tunngatillugu aningaasanik tapiissutinik ujaasisariaqartarpoq.
Innarluutillit illersuisoqarfiat aamma suliniutit naammassiniarlugit paasititsiniaanissamullu aningaasanik immikkut aningaasaateqarfinnut qinnuteqartariaqartarpoq.
- Inatsisitigut suliassat suliariumallugit aningaasaateqarfinnut tapiissutinik qinnuteqartuartariaqarneq aaqqiissutaasinnaanngilaq ataavartoq, taamatummi qinnuteqarneq qularnartortaqartuaannarpoq, Anja Hynne Nielsen oqarpoq.
Kusassaataannaassanngitsoq
Tilioq isumaginninnermi siunnersortimik atorfinitsitsisimavoq. Tamatumalu kingunerisaanik sineriammut paasisassarsiorluni angalanerit paasissutissanik katersiviusartut annikillisinneqarsimallutik. Tassa suliat taamatut piareersartariaqartarput, arlalitsigullu ulapillutik angummanniartariaqartarlutik.
- Eqqaamaneqartariaqarpoq Tilioq nunatsinni inuit innarluutillit illersuisoqarfigimmagu, immikkuullarissuuvoq pingaaruteqartumillu suliaqarfiuvoq, pisariaqartinneqarnera takussutissaqarluarpoq nunanilu allani taamatut illersuisoqarfiunngitsuni nuannaartorineqarpoq, neriuutigaara politikkikkut amerlanerussuteqartut aningaasanut inatsimmi aningaasaliinerunissaq qulakkeerumaaraat, innarluutillit illersuisusat Tilioq kusassaataannaassanngitsoq erseqqissaasoq oqarpoq.
- Illersuisoqarfiussaarli inuiaqatigiinni tamakkiisumi isiginnilluni pitsanngorsaatinut tamanut iluaqutaasussanut ikiuutaasussaq, aammali inuit innarluutillit inuiaqatigiinni ikinnerussuteqartut annersaannut iluaqutaalluni, tassami taakkuupput minitaasartut sumiginnangaanerpaasartullu.