Innarluutillit illersuisortaavat sulilerpoq

Naalakkersuisut Christina Johnsen, Nunatsinni innarluutillit illersuisuattut siullersaattut ukiuni pingasuni atuuttussamik septembarip qaammataani toqqarpaat. Taanna sapaatip-akunneri marlunni innarluutillinnut illersuisutut atorfeqareersimalerpoq Nuummilu ataatsimeeqateqarnerit ingerlatileruttorlugit. Innarluutillit illersuisuat Sermitsiaq.AG-p oqaloqatigisimavaa.

- Sapaatip-akunneri siulliit marluk ingerlanerini peqatigiiffiit arlallit, naalakkersuisoqarfiit, politikkimik suliallit, inatsisilerituut, ombudsmandi isumaginninnermilu naammagittaalliuteqartarfik, paasisimasallit allallu ataatsimeeqatigisimavakka. Pissarsilluaqaanga, innarluutillit illersuisuat Christina Johnsen oqarpoq.

Pissarsiarpassuit

Christina Johnsenip oqaatigaa, pissarsiarisimasani aallaavigalugit isumassarsiorluni, sammineqartumullu suut unammilligassaanerpaanersut paasiniarlugu.

Innarluutillit illersuisuata paasissutissiaraa, Sisimiuni Tele-Postip illorsuani allaffittaarsimanini, sanasuniillu massakkut iluarsartuunneqartoq. Allaffiullu pisatassai suli tikissimanngillaq.

Allaffimmi sulisut marluk

Innarluutillit illersuisuata ingerlatsivia inatsit naapertorlugu marlunnik sulisoqartussaavoq, sulisorineqalertussallu taakku marluk suut piginnaasaqarfigissaneraat Christina Johnsenip eqqarsaatigaa, atorfiillu inuttassarsiuutissamaarlugillu.

- Innarluutillit pillugit paasisimasalimmik, inatsisinillu ilisimasalimmik allalluarsinnaasumik arlalinnillu piginnaasaqartumik suleqateqarnissara kissaatigaara. Neriuutigaara inuit soqutiginnittut atorfimmut inuttassarsiuussisoqalerpata malinnaajumaartut, arlalinnik suliuteqarlunilu ingerlatsivimmi suliassaqarluni pissaganaqaaq, innarluutillit illersuisuat, arlallit qinnuteqarnissaat neriuutigalugu, pissagalluni oqarpoq.

Isumassarsiarpassuit

Christina Johnsenip oqaatigaa, arlalinnik isumassarsiaqarsimalluni, takorluugarpassuillu piviusunngortinnissaannut suleqateqarnissani amigaatigaa.

Innarluutillit illersuisortaavat uummammioqarluni erseqqissaatigaa, inuimmi sulinerup nalaani innarluuteqaleriasaarsimasut, assersutigalugu taqqamik milittoorsimasut allatigulluunniit innarluuteqaleriasaarsimasut, immikkut samminiarlugit.

Suliinnartariaqaraluartut

- Taakkua suliinnarnissaat periarfissaasariaqarluarpoq, innarluuteqarlersimasunillu soraarsitsineq atorunnaarlugu, suliffeqarfiit pisussaaffilerneqartariaqarput innarluuteqalersimasunut nalimmassaasalernissaat, Christina Johnsen oqarpoq.

Taanna isumaqarpoq, assigiinngisitsinerit immikkoortitsinerillu amerlavallaartut. Sulinerullu nalaani innarluuteqalersimasut soraarsinneqartarnerat ajornanngippallaartoq.

Innarluutillit illersuisuata orniginartinnerungaluarpaa, innuttaasoq/inuk innarluuteqalernermini pitsorlulernermiluunniit, sulisitsisuisa innarluuteqarlersimasunut pitsorluuteqalersimasunulluunniit nalimmassaanerisigut, suliffitsik attatiinnarsinnaagaat.

Innuttaasunit attaveqarfigineqarusuttoq

Christina Johnsenip maluginiarsimavaa innuttaasut attaveqarusullutik pisariaqartitsinerat. Taamaammat nittartakkamik pilersitsisoqassaaq, tassani attaveqarfissat ajornannginnerusut innarluutillillu illersuisuat qanoq atorneqarsinnaanera qanorli atorneqarsinnaannginnera pillugit paasissutissanik imaqassalluni.

- Saaffiginnissutit massakkut tigusimasakka suliat ataasiakkaajupput, soorlu kommunimiit akissuteqarfigineqarsimanngitsut. Suliat ataasiakkaat suliarisinnaanngilakka, suliassakka atituujullutillu naliginnaasuunerissapput, innarluutillit illersuisuat erseqqissaavoq.