Innarluutilinnut sullissiviup Pissassarfiup ukiua siulleq
Ukiumi ingerlatsiviusumi siullermi inuit innarluutillit 51-it nuna tamakkerlugu innarluutilinnut sullivissimmut Pissassarfimmut Sisimiuniittumut najugaqarallarnissamut innersuunneqarsimapput najugaqarnertillu tamakkiisumik pissarsissutigisimallugu. Kisianni innarluutilinnut sullissivik suliassanut naammassisinnaasanullu atatillugu nalorninartunik killilerneqarnernillu misigisaqartarpoq
Innarluutilinnut sullissivik Pissassarfik Sisimiuniittoq silataanit suli nutaatut kusanartutullu isikkoqarpoq. Matumut pingaarnermut silittumik kaassuartakkanut aqqutissaqarluni matoqarlunilu isumamineersumik ammartartunik alloriusaqanngitsunillu sumiiffiup ukiumini siullermi meeqqat, inuusuttut inersimasullu innarluutillit taakkualu sugisaat suliamullu ilisimasaqartut tikilluaqqusimavai. Quppersagaaraq “inuit innarluutillit”, paarlersuarmi nalaasarfimmi teqeqqumiittoq naapertorlugu timikkut, tarnikkut, oqalussinnaanikkut ilikkagaqarsinnaassutsikkullu innarluutinut atatillugu ilitsersorneqarnermik, siunnersorneqarnermik, qulaajaaffigineqarnermik, atuartinneqarnermik, pikkorissarneqarnermik, katsorsarneqarnermik sungiusarneqarnermillu pissarsisinnaapput. Siunertaq tassaavoq inunnut innarluutilinnut inuunerup pitsaassusaanik isumalimmillu inuuneqarnissamut periarfissanik pitsanngorsaanissaq.
Pissassarfiup pisortarigallagaata Nûno Motzfeldt-Skovgaardip ukioq siulleq paarmorfittut oqaatigaa.
- Ukiumik ataasinngortorsiorluta nalliuttorsioqqammerpugut. Oqartoqarsinnaavoq illu suli paarmorfimmiittoq. Suli nutaajuvoq, uatsinnuinnaanngitsoq, aammali atuisunut. Ukiup siulliup ingerlanerani maani Sisimiuni misileraanernik ingerlataqarsimavugut, paasiniarlugu innuttaasunik qanoq suleqateqassanerluta. Tulliatut misilittakkat taakkua aallaavigalugit innuttaasunut nunamit tamarmeersunut ammarsimavugut. Tamanna suli nalilersuiffigineqarpoq. Naammattumik pitsaassuseqarnersoq imaluunniit pitsaanerusumik ingerlanneqarsinnaanersoq nalilersuiniarluta eqikkaajuartarpugut, Nûno Motzfeldt-skovgaard oqarpoq.
Pissassarfik ukiumi siullermi kommuninit tulleriiaarinerit tunngavigalugit inunnik innarluutilinnik taakkualu sugisaannik ikorfartortaannilluunniit ulluni 14-ini najugaqariartortunik tigusaqartarsimavoq. Pissassarfimmi sulisut ukiumi siullermi assartuinermut tunngasunik ajornartorsiuteqarsimavoq innuttaasut innaarlutillit ilaquttaminnik ikorfartortiminnilluunniit ilagineqartut pikkorissarnermut peqataajartortissinnaajumallugit.
Allaaserisaq tamaat aaviisimi Sermitsiami atuaruk – uani ataani isissutissarsigit: