Innarluuteqarneq: Innarluutillit ulluinnarni inuunerat pillugu suliniut piviusulersaarutaasoq
Innarluutillit illersuisoqarfiat Tilioq aamma Uilu Stories piviusulersaarusiornissamut suliniutissamik isumaqatigiissusiorsimapput, Kalaallit Nunaanni inuit innarluutillit ulluinnarni inuunerannik takutitsisussanik, sisamanik immikkoortortalinnik filmiliorniarlutik.
Inuit innarluutillit piviusulersaarummi nutaami inuunerminni atukkatik oqaluttuarissvaat, Tilioq tusagassiorfinnut nalunaaruteqarluni ilisimatitsivoq.
Piviusulersarummut qulequtsiunneqarsimavoq ”Uanga innarluutigaanngilanga”, tassanilu takutinneqassaaq ”inuiaqatigiinni qanoq ililluni inunnut innarluutilinnut aporfiliisoqarsinnaanersoq aamma inuillu qanoq ilillutik aporfinnik taakkuninnga piuneerutitsisinnanersut, taamaalillunilu allat naligalugit inuit innarluutillit inooqataasinnaanersut”.
Oktobarimi takuteqqaarneqassasoq
Pilersaarutaavoq, ukioq manna oktobarip qaammataani nuna tamakkerlugu inunnut innarluutilinnut sapaatip akunnerititami piviusulersaarutit nangeqattaartut takuteqqaarneqarnissaat, aamma atuarfimmi atuartut angajulliit, ilinniarnertuunngorniartullu piviusulersaarummit nangeqattaartumit immikkuualuttut saqqummiunneqartut pillugit suliaqartinneqarnissaat.
Pilersaarutaavoq, piginnaasakillinerit sisamat pingaarnerit qitiutinneqassasut: timikkut, tarnikkut, eqqarsartaatsikkut ilisarsiniarnikkullu piginnaasakillinerit, tusagassiorfinnut nalunaarummi ilisimatitsissutigineqarpoq.
Filmiliornermi ilitsersuisoq
Filmiliornermi ilitsersuisoq Aka Hansen, nangeqattaartuliamik suliaqartussat imatut oqarpoq:
- Suliniummut uunga peqataavunga pissutigalugu Kalaallit Nunaanni inunnut innarluutilinnut pissutsit ukkatarineqarnissaat amigaatigineqarmat. Tamannalu uanga tapertaaffiginiarpara. Inuit naapinnissaat oqaluttuassartaannillu tusarnaarnissaq aammalu immikkoortuliat inuiaqatigiinnut siammasissumik takutinneqarnissaat qilanaaraara. Oqaluttuarineqartussat oqaluttuarineqarneq ajukkajupput, kisiannili inuiaqatigiinni ilisimasarineqarnissaat pingaaruteqarpoq. Taamaammat suliniut una pillugu Tilioq suleqatigisinnaanngorakku nuannaarutigaara.
Suliniut NunaFondenimit, Royal Arctic Linemit aamma Tips- og Lottomidlernemit aningaasaliiffigineqarsimavoq.