Innarliineq pinngitsaaliinertut tamatigut pineqaatissiissutaaneq ajortoq

Meeqqamik innarliineq inatsimmi pinngitsaaliinertut tamatigut isigineqarneq ajorpoq

Pineqaatissiissutit marluk, tassa ataatsip meeqqamik pinngitaaliilluni atoqateqarsimanera allallu meeqqamik kinguaassiuutitigut innarliisimanera pillugit Sermitsiaq.AG-mi ilanngutassiarineqartut oqallinnermik pilersitsisimapput.

Oqallittut ilaannit oqaatigineqarpoq, angutip 30-nik ukiullip niviarsiaqqamik 13-inik ukiulimmik pingasoriarluni atoqateqarsimanermik kinguaassiuutitigut innarliisimasutut pineqaatissinneqarsimanera pinngitsaaliisimasutut pineqaatissiissutigisariaqaraluaraa.

Tamannali eqqortumik pinninnerusssanngilaq, tassa 30-nik ukiullip tamanna pineqaatissiissutiginnginnamiuk. Meeqqanik 15-it inorlugit ukiulinnik kinguaassiuutitigut sammisaqarneq pillugu paragrafi naapertorlugu pineqaatissinneqarami, tassa tamanna meeqqamik kinguaassiuutitigut innarlinertut nalinginnaasumik taasakkatsinnik.

Innarliineq pinngitsaaliillunilu atoqateqarneq pillugit pinerluttulerinermut inatsit

Paragraffit marluk uku inarliinermut pinngitsaaliillunilu atoqateqarnermut tunngassuteqarput:

§77

Pinngitsaaliiluuni kujanninnermut eqqartuunneqassaaq
nakuuserluni imaluunniit nakuusernissaq qunusaarutigalugu pinngitsaaliilluni kujannittoq imaluunniiit kinguaassiuutitigut allatut ittumik atuisoq.

Imm. 2. Taamatut aamma pineqassaaq iliuuseq imm. 1-mit ilaatinneqarsimanngippat § 91-mi oqaatigineqartutut inatsisit unioqqutillugit pinngitsaaliilluni kujannittoq imaluunniit kinguaassiuutitigut allatut ittumik atuisoq.

Imm. 3. imalunniit meeqqamik aqqaneq-marluk inorlugit ukiulimmik kujannittoq imaluunniit kinguaassiuutitigut allatut ittumik atuisoq.

§79

Kinguaassiuutitigut meeqqamik atuinermut eqqartuunneqassaaq meeqqamik 15-t inorlugit ukioqartumik kujannittoq imaluunniit kinguaassiuutitigut allatut ittumik atuisoq, meeqqap qassinik
ukioqarnera nalunngikkaluarlugu imaluunnit tassunga tunngasumik mianersuaalliorluni iliorsimaguni, pineqartoq § 77, imm. 1, nr. 3-mut attuumassuteqanngippat.

Pinngitsaaliilluni atoqateqarsimasutut pineqaatissinneqassagaanni, pinerluuteqartoq kujanninniarluni kinguaassiuutitigulluunniit allatut ittumik atuiniarluni nakuusernermik, nakuusernissaq qunusaarutigalugu pinngitsaaliinermillu atuisimasariaqarpoq. Aamma inuk, assersuutigalugu aalakoornini, sininnini imallunniit 'ikiaroornartumik sianiginngisaminik atuitinneqarsimanini' pissutigalugit imminnut illersorsinnaanngitsoq atornerlunneqarsimappat pinngitsaaliilluni atoqateqarsimasutut pineqaatissiissutaasarpoq.

Inatsimmut allannguut: Meeraq aqqaneq-marluk inorlugit ukiulik pinngitsaalillugu atoqatigineqaraangat

Meeqqamilli innarliineq, meeraq aqqaneq-marluk inorlugit ukioqaraangat tamatigut pinngitsaaliilluni atoqateqarsimasutut pineqaatissiisoqartarpoq. Kalaallilli Nunaannut tunngatillugu pinerluttulerinermut inatsimmut ilanngussaq tamanna nutaajulluinnarpoq, tassa ukioq manna februaarip qaammataani aatsaat atuutilerami.

Allannguinermi erseqqissaassutigerusunneqarsimavoq, meeqqanik innarliisarnerit ajorluinnartutut isigalugit pimoorunneqarnissaat. Siunnersuut Inatsisartuni suliarineqarmat, Inuit Ataqatigiit oqaaseqartartuata tunngavilersuutigaa, pineqaatissinneqassagaanni minnerpaamik 15-inik ukioqartoqartariaqartoq, tamanna atuuttuuppat qulaani pineqartoq pinngitsaaliilluni atoqateqarsimasututu pineqaatissinneqarsimassagaluarpoq.

Aamma ukiukitsunik kinguaassiuutitigut innarliinerit pillugit paragraffimut tunngatillugu pisoqarsinnaavoq pineqaatissiissutaanngitsumik. Pineqaatissiisoqassappammi meeraq 15-it inorlugit ukioqartoq nalunnginneqartariaqarpoq imaluunniit nalunnginneqarsimasariaqaraluarpoq (mianersuaalliorluni iluuseqarneq). Meeraq aqqaneq-marluk inorlugit ukioqarpat, aalajangersagaq tamanna atuutissanngilaq, oqaatigineqartutummi ullumikkut tamanna pinngitsaalilluni atoqateqarsimanertut pineqaatissiissutaasussaammat.

Powered by Labrador CMS