Innarlernerneqarsimanerup kingorna neriuuteqarneq pillugu filmi nutaaq

Filmi piviusulersaarut, ”Pilluarneq Ersigiunnaarpara”, inunnik marlunnik meeraanerminni kinguaassiuutitigut innarlerneqarsimasunik inuttaqarpoq

Gukki Nuka inuusuttulluni illoqarfik angerlarsimaffini Uummannaq qimallugu allamut nuuppoq. Arsaannermi sungiusaasumi pinngitsaalilluni atornerloreeraani ukialuit qaangiummata qimaalluni aallarami. Ukiut 36-t qaangiuttut aatsaat siullermeerluni aasaq manna tikeqqippaa.

Filmimi piviusulersaarummi ”Pilluarneq Ersigiunnaarpara”-mi angerlamut ingerlaarnera malinnaaffigineqarpoq - Killiliisami suliniuteqarnermut atatillugu filmiliaritilluni.

Filmimi pingaarnertup inuttap aappaa, kinguaassiuutitigut innarlerneqarsimanermi kinguneranik ulloq manna tikilluguannilaangajuartoq, 24-nik ukiulik, Kornelia. Annilaangajuarninili qaangersimavaa, meeraanerminilu nammineq kissaatigisimasamisut kiffaanngissuseqarluni inuuneqarnissani anguniarlugu.

- ”Pilluarneq Ersigiunnaarpara”pillugu piviusulersaarut oqimaatsunik imaqaraluarluni pissarsiffiginartupilussuuvoq, tassani Gukki Nuka Kornelialu meeraanerminni ajoquserneqarsimanerminnik kingunerlutsitsigaluarlutik ajunngitsumik toqqissisimanartumillu inuuneqalersimanerminnik takutippaatigut, filmip nassuiarneqarnerani allassimavoq.

Inummut tunngasut taakku oqaluttuaat Namminersorlutik Oqartussat tarnip pissusaanik ilisimasallit angalasartuinut annertunerusutigut atatillugit takutinneqarput.

- ”Pilluarneq Ersigiunnaarpara” Pitsaaliuinermut Isumaginninnermullu Aqutsisoqarfik sinnerlugu Nivaara Filmsimit suliarineqarpoq. Piviusulersaarut Naalakkersuisut kinguaassiuutitigut innarliisarneq akiorniarlugu periusissiaannut, Killiliisamut atatillugu suliaavoq.

Filmi novembarip Nuummi Katuami arfineq-appaanni takuteqqaarneqassaaq, takutinneqareerpat oqallittoqassalluni.. Takutinneqarnissaa ullormit sioqqullugu suliamut atatillugu suliallit NGO-llu sammisaqassapput.

Sapaatit akunneri pingsut tulliuttut filmi Ilulissani, Aasianni, Maniitsumi, Narsami Tasiilamilu takutinneqassaaq.

Pitsaaliuinermut Isumaginninnermullu Aqutsisoqarfimmit sulissutigineqarpoq, filmip piffissaq ungasinnerulaartoq qaangiuppat innuttasuni tamanit takuneqarsinnaalernissaa.

Filmi meeqqanut 15-it inorlugit ukiulinnut takoqquneqanngilaq, meeqqallu 18-it inorlugit ukiullit inersimasumik ilaqartinneqarnissaat inassutigineqarpoq.

Powered by Labrador CMS