Innarlerneqarsimasoq: Kornelia pilluaqqittalernissaminik upperinnittoq
Kornelia Benjaminsen filmimi piviusulersaarummi 'Pilluarneq Ersigiunnaarpara'-mi pingaarnertut inuttaasut marluusut aapparaa, filmi ullumi Danmarkimi siullermeersumik takutinneqassaaq
Nalunaaqutaq qulingiluanut iluarsisaq, tassa Københavnimi filmimik takutitsineq Killiisamut atassuteqannginnera erseqqissaaffiginiarlugu.
Siorna novemberip arfineq-aappaat ulluuvoq Kornelia Benjaminsenip pissangalluni utaqqisimasaa. Ulloq taanna filmi peqataaffigisimasaa 'Pilluarneq Ersigiunnaarpara' Nuummi Katuami takuteqqaarneqarpoq.
Filmimi oqaluttuarai kinguaassiuutitigut innarlerneqartarsimanini, aammali innarlerneqarsimanerminit kingunerluutini qaangerniarlugit qanoq ikiorserneqarsimanini oqaluttuaralugit. Maanna pissanngassutigaa isiginnaartut qanoq qisuariassanersut.
- Filmi naammassimmat Katuami filmertarfik ulikkaarlugu isiginnaariarsimasut 400-sut tamarmik nikuillutik ersaartaapput. Misigisaq annertoqaaq, arnaq inuusuttoq taanna Sermitsiaq.AG-mut oqarpoq.
Takuteqqaarnerani qiasimasoq
Filmimi pingaarnertut inuttaasup aappaaraa eqqumiitsuliortoq Guki Nuka, taassuma ilaatigut Killiliisami maligassiuisutut meeraanermini pinngitsaalisaalluni atoqatigineqarsimanini arlaleriarluni oqaluttuarisarpaa.
- Gukki Nukap saniani issiavunga, tamarmillu nikuillutik ersaartaatilermata marluulluta qullivugut.
- Filmimi oqaluttuariniagarput annertuumillu sulissutigisimasarput inunnit paasineqarsinnaannguatsiarmat qujamasoqaanga.
Kornelia Benjaminsen innarlerneqarsimanermi kingunerluutigisaanik aaqqiiniarnermini tarnip pissusaanik ilisimasalimmit ikiorserneqarsimavoq.
- Inuit ikiortissarsioqqullugit kaammattorusuppakka. Uanga ikiorserneqarnikuungama nukissaqaqqilerlungalu inuunera ajunngitsumik ingerlalernikuuvoq.
- Kiserliorluinnartutut misigisarsimavunga, artornarsimaqaarlu, taamaammat ikiortissarsiornissamut sapiissuseqalersimanera aalajangiisuulluinnarsimavoq. Pisimasoq annernartuaannartussaavoq, annerisammali qanoq iliuuseqarfisinnaanera ilikkariartorpara.
Filmi ikiortissarsiornissamut sapiissuseqalersitsisimasoq
Eqqortumik ikiorserneqarnermi nukittoqqittoqarsinnaanermik oqariartuuteqarneq isiginnaartunit paasineqarsimasoq, Kornelia Benjaminsenip filmip takutinneqartarnerani maluginiarsimavaa.
- Arlallit oqaatigisarpaat, innarlerneqarsimanertik pillugu oqaluuserinninnissamut maanna sapiissuseqalersimallutik. Ataasiakkaat allaat oqartarput, aqanguani tarnip pissusaanik ilisimassalimmut inniminniiniarlutik.
Filmi Kalaallit Nunaanni innarliisarnermik akiuiniarluni suliniutip Killiliisap ilaatut Nuummi takutinneqarnerata saniatigut Ilulissani, Aasianni, Narsami, Tasiilami Maniitsumilu takutinneqarsimavoq.
Filmi Atlantikumi nunat avannarliit filmertitsinerannut atatillugu ullumi Københavnimi Nordatlantens Bryggep aaqqissuussaanik takutinneqassaaq. Tassa ullumi takutitsinissaq Killiliisamut attuumassuteqanngilaq. Ullumi takutitsinermut Gukki Nuka Københavnimi najugaqartoq kiisalu filmimi ilitsersuisoq Nivi Pedersen peqataassapput. Ullumi filmimik takutitsinissamut atatillugu Kornelia Benjaminsenip Danmarkimut angalanissaanut aningaasassaqartitsisoqanngilaq.
- Københavnimi takutinneqarneranut peqataasinnaannginnera ajuusaarutigilaarpara, danskimmi filmimut qisuariassanersut takorusukkaluarpara, Kornelia Benjaminsen oqarpoq.
Atlantikumi nunat avannarliit filmertitsinerannut atatillugu 'Pilluarneq Ersigiunnaarpara' ullumi martsip aqqarnanni nal. 17.00 Nordatlantens Bryggemi takutinnqassaaq.
Kinguaassiuutitigut innarlerneqarsimaneq pillugu oqaloteqarnissamik pisariaqartitsiguit kinaassutsit isertuullugu Tusaanngamut 1899 aqqutigalugu SMS-ersinnaavutit imaluunniit 801180 aqqutigalugu sianersinnaavutit.