Innaarsunni innuttaasut isumannaatsumut pisinneqartut
Tassaarsuaqarnissaanut ernumassuteqartoqarnerani innuttaasut immamut qanittumi najugaqartut politiinit qutsinnerusumukarnissaannik qinnuigineqarput
Innaarsunni innuttaasut immamut qanittumi najugaqartut illutik qimassagaat qinnuigineqarput. Politiit pigaartoqarfiat Sermitsiaq.AG-mut taama ilisimatitsivoq.
Iluliarujussuup nunaqarfiup eqqaani ikkarlinnerata kingorna tamanna pivoq.
Iluliarsuup aserorluni nunaqarfimmi tassaarsuaqartitsisinnaanera, politiit ernummatigaat.
Aalajangerneq kommunimi upalungaarsimasut suleqatigalugit pivoq.
- Iluliarsuaq kommunimiit upalungaarsimasuniillu malinnaagivigeqqissaarneqarpoq, aammalu nunaqarfimmi innuttaasut, sissamut qanittumi najungaqartut, kaammattorneqarlutik, sillimmartaarnissaq pillugu nunaqarfimmi qutsinnerusumi najungaqartunut inissikkallarnissaannik, Avannaata Kommunia tusagassiuutinut nalunaarummi allappoq.
Nunaqarfimmi aqutsisut siulittaasuat Karl Petersen, nunaqarfimmi upalungaarsimanermik pilersitsisoqarnissaanut ippassaq kajumiassaarivoq.
- Innaarsunni iluliarsuup nunaqarfiup avateralaateralaannguanut ikkarlisimasup nunaqarfimmut navianartorsiortitseratarsinnaanera, Avannaata Kommuniata upalungaarsimanermi attuumassuteqartut suleqatigalugit, isumannaallisaaneq anguniarlugu sulisoqarnera erseqqissaatigissavaa, kommuni allappoq.
Nunatsinni qitiusumik upalungaarsimasoqarfik aamma aallartinneqarpoq.
- Kalaallit Nunaanni Upalungaarsimasut pisunut tunngasut isumagaat aammalu Pinngortitamut Avatangiisinullu Naalakkersuisoqarfik pisunut malinnaalluarpoq.
Pinngortitamut Avatangiisinullu Naalakkersuisoqarfiup Innaarsunni innuttaasunut kommunip annaassiniarnissamut upalungaarsimasuisa politiillu innersuussutaat maleqqullugit kaammattuuteqarput, tassanngaanniit taama nalunaaruteqartoqarpoq.