Skip to main content

Innaallagissamut, imermut kiassarnermullu akit allanngortut

Akinik allannguineq martsip aallaqqaataanit atuutilissapput

Innaallagissamut, imermut kiassarnermullu akit nutaat Nukissiorfimmit saqqummiunneqarput. 

Nukissiorfiit innaallagissamut kiassaanermullu akigititaasa akigitinneqartut akissarsiallu 2014-imi ineriartornerat malippaat. Taamatut pisoqarpoq naak uuliap akiata 2013-imi qaffariaateqarneratigut akigitinneqartunik qaffaanerunissamik ilimasaarisoqarsimagaluartoq.

- Nukissiorfiit 2014-imut missingersuutinut ilannguppaat aningaasartuutinut aalajangersimasunut 8 mio. koruunit missiliorlugit amerlassuseqartunik sipaaruteqarnissaq, aammattaaq tamanna ukioq manna akigitinneqartunut sunniuteqassaaq, Nukissiorfiit pisortaat Henrik Estrup oqarpoq.

Ungasianit kiassarneq
Ungasianit kiassaanermut akigitinneqartoq mWh-imut 7 koruuninik apparpoq mWh-imut 810 koruuneqalerluni, ungasianiit kiassaanermut qaminneqarsinnaasumut akigitinneqartoq mWh-imut 2 koruuninik apparpoq mWh-imut 750 koruuneqalerluni.

Innaallagissamik kiassaanermut aalajangersimasumut akigitinneqartoq kWh-imut 0,01 koruunimik apparpoq 0,81 koruuneqalerluni, innaallagissamut kiassaanermut qaminneqarsinnaasumut akigitinneqartoq kWh-imut 0,75 koruuniusoq allanngortinneqarnani.

Nalinginnaasuuvoq kiassaanermut akitinneqartut uuliap akianut naleqqussarneqartarnerat. Taamaattumik akitinneqartunik qaffaanissat nalinginnaasumik kiassaanermut mWh-imut 850 koruuninut naatsorsorneqarput kiassaanermullu qaminneqarsinnaasumut mWh-imut 790-inut, kisianni Nukissiorfiit kiassaanermut akigitinneqartut 5 %-imik appartinneqarnissaannik inassuteqarnerisigut akigitinneqartut matuma siuliani allassimasutut isikkoqassapput.

Innaallagiaq
Innaallagissamut akiusut ilaatigut aalajangersarneqarput 2012-imi innaallagissamik pilersuinerup qanoq akeqarsimanera aallaavigalugu pisisartullu innaallagissamik atuisimanerminnut qanoq akiliuteqarsimanerannut sanilliullugu. Innaallagissamut akigitinneqartup qaffasinnerpaajusup ukioq manna qaffanneqarneranik tamanna kinguneqarpoq. Qaffaanerli akigitinneqartut akissarsiallu 2014-imut ineriartornerinut 1,5 %-itut annertussusilimmut killeqartinneqarput.

Tamatuma kingunerisaanik innaallagissamut akigitinneqartup qaffasinnerpaajusup 5 oorimik qaffanneqarpoq, taamaammallu kWh-imut 3,29 koruuneqalerluni. Akigitinneqartoq qaffasinnerpaajusoq tassaavoq aki qaffasinnerpaaq inuit pisisartut namminneq 2014-imi akiligassarisaat. Akigitinneqartoq akikinnerpaaq 2 oorimik qaffappoq, tamatuma aammattaaq 1,5 % assigaa. 2014-imi Nuummi Sisimiunilu illoqarfinni taakkunani taamaallaat akigitinneqartoq akikinnerpaaq atuutsinneqassaaq.

Ukioq manna aammattaaq nunap immikkoortuni akigitinneqartut annertuumik assigiinngissuteqassapput, illoqarfinnilu tamani akigitinneqartut qaffaavigineqassanngillat. Illoqarfinni Qaqortumi/Narsami, Ilulissani Tasiilamilu akigitinneqartut appassapput 27 %-imik, 14 %-imik aamma 17 %-imik. Nunaqarfinni ataasiakkaani akigitinneqartut 1,5 %-imik annertunerusumik qaffaavigineqassapput akigitinneqartoq qaffasinnerpaaq tikillugu, soorlu tamanna nunaqarfinni allanissaaq atuuttuusoq. Tassani pineqarput Kangaamiut, Niaqornat aamma Ikerasak. Nunaqarfinni taakkunani akigitinneqartut qaffassapput 12-imik, 17-imik aamma 5 %-imik.

- Nukissiorfiit suliffeqarfittut pisortanit pigineqartutut akisussaaffini ilisimaarivaa. Ukioq manna akigitinneqartut naatsorsorneqarneranni pissutsit arlaqartut qaffaanissamut aalajangiisuupput. Tamannami Nukissiorfinnut sinneqartoorujussuarnissamut kinguneqartussaagaluarpoq, inuiaqatigiilli tungaannit isigalugu innuttaasunut pitsaaqutaasussanngortinneqarnerusussaq, Henrik Enstrup tusagassiutinut nalunaarummi oqarpoq. 

Imeq
Imermut akigitinneqartoq qaffasinnerpaaq 2014-imi 52 oorimik qaffappoq, aammattaaq 1,5 %-ip assigisaa. Akikinnerpaajusoq 1,5 %-imissaaq qaffanneqarpoq, 23 oorimik naleqartoq m3-imut 15,46 koruuniusumut. Taamaallaat Ilulissani akigitinneqartoq akikinnerpaaq 2014-imi akigitinneqassaaq. Taamatuttaaq imermut akigitinneqartut nunap immikkoortuini assigiinngissuteqarput, Aasianni akigitinneqartoq 25 %-imik appartinneqarluni 2012-imi aningaasartuutit appartinneqarsimanerannik tunngaveqartumik. Sisimiuni akigitinneqartoq 10 %-imik appartinneqarpoq, Nuummi akigitinneqartoq 10 %-imik qaffariaateqartoq.

Ataatsimut takussutissat:

  • Innaallagissamut aki akisunerpaaq 0,05 koruunimik qaffappoq kWh-imut 3,29 koruuneqalerluni.
  • Imermut aki akisunerpaaq 0,52 koruunimik qaffappoq m3-imut 35,49 koruuneqalerluni.
  • Innaallagissamik kiassaaneq aalajangersimasoq kWh-imut 0,01 koruunimik appariarpoq kWh-imut 0,81 koruuneqalerluni, innaallagissamik kiassaaneq qaminneqarsinnaasoq kWh-imut 0,75 koruuneqartoq atatiinnarneqarluni.
  • Ungasianit kiassaanermut aki mWh-imut 7 koruuninik apparpoq mWh-imut 810 koruuneqalerluni.
  • Ungasianit kiassaanermut qaminneqarsinnaasumut aki mWh-imut 2 koruuninik apparpoq mWh-imut 750 koruuneqalerluni

Illoqqarfiit ilaanni innaallagissamut akigitinneqartoq appariassaaq.

Nalinginnaasumik atuinermut naleqqiussilluni pisisartut (aalisakkanik suliffissuit pinnagit) ukiumut aningaasat sipaarutissaat tassaapput:

Qaqortoq: 7.071.987,- koruunit
Narsaq: 3.677.105,- koruunit
Ilulissat: 6.498.210,- koruunit
Tasiilaq: 2.406.157,- koruunit

Katillugit 19,2 miliionit koruunit missaanni.

Nunarput tamakkerlugu innaallagissamut, imermut aamma kiassaanermut akigitinneqartunik katillugit allanngortitsinerup kingunerisaanik 14,3 mio. koruunit missaannik sipaaruteqartoqassaaq (aalisakkeriviit pinnagit).

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER