Inissisimalluarneq - Naalakkersuisut eqeersimaassagunik
Amerikamiut Kalaallit Nunaannik soqutiginninnerulersimanerat, aallartitap Sandsip sapaatip akunnerani kingullermi Kujataani tikeraarneratigut paasinarsivoq. Iluaqutigissagutsigu Namminersorlutik Oqartussat piffissaq ungasinnerusoq isigalugu anguniakkat tungaatigut eqqarsarluarnerusariaqarput.
Amerikamiut ukiuni kingullerni Kalaallit Nunaannik soqutiginninnerulersimanertik takutinnikuuaat. Aallartitap Carla Sandsip Kujataani tikeraarnera assersuutit kingusinnerpaat ilagaat. Maannakkulli aamma Naalakkersuisut periarfissat ilisimassavaat, immikkut ilisimasallit oqarput.
AG taama allappoq.
- Arlaannik Amerikamiunit pissarsiniartoqartillugu sunarpiaq kissaateqartoqarnersoq ilisimassallugu pingaartuuvoq. Joint Committeemi oqartoqarpat matumani periarfissaqartoq, imatorpiarlu ikiuussinnaasoqartoq, taava isumaqarpunga Kalaallit Nunaat iluatsitsinissaminut periarfissaqarnerusoq, Jon Rahbek-Clemmensen Danmarkimi Forsvarsakademimi sakkutooqarnikkut immikkoortumi lektori taama oqarpoq.
Ilisimatusarfimmi oqalugiartinneqartoq, siusinnerusukkut nunatsinnit aallartitaq aamma Nunat Avannarliit Ministeriisa Siunnersuisoqatigiiffianni pilersaarusiornermut siunnersortiunikoq Nauja Bianco isumaqataavoq Namminersorlutillu Oqartussat nunanit allanit aningaasaliissutinik qanoq pissarsiniartoqarnissaanut ersarinnerusumik periusissiornissaat ujartorlugu.
- Eqqarsaatersuutigineqartariaqarpoq suut atorfissaqartinnerivut, suleqatigiinnermilu piumasaqaatit suut atorusunnerivut, oqarpoq, tikkuarlugulu Kinamiut uagutsinnit allaanersumik eqqarsartaaseqartut, AG-mut oqarpoq.
Kina qulaaniit aqoqqissaarneqarneruvoq, ukiorpassuarnut aningaasaliisinnaallutik suliffeqarfiutitik naalakkersuinikkut aqunneqartut aqqutigalugit nunanut allanut politikkimi anguniakkatik anguniarlugit.
- Taamaattumik namminiilivinnissamik kissaateqarnermut suleqatigiilernitsinnut atatillugu Kinamik niueqateqarnissaq Kalaallit Nunaannut silatusaarnerugaluartoq eqqarsaatigalugu namminersulernissarput annikillisinnaavarput, Nauja Bianco oqarpoq.
Immikkut ilisimasallit nalilersuinerat pillugu AG-mi kingullermi saqqummersumi atuarsinnaavutit, uani ataani linki atorlugu isissutissarsisinnaavutit: