Inissiisarfinni sulisut akissarsiaqarnerulissapput: Qaammammut 7.000 koruuninik qaffaavigineqartut

Kalaallit Nunaanni pineqaatissinneqarsimasunut inissiisarfinni sulisut kingumoortumik atuutilersumik qaammammut akissarsiaqarnerulernissartik naatsorsuutigisinnaalerpaat. Aningaasat qaffaanermut atorneqartussat 38 milliuunit koruunit aprilimi isumaqatigiissutigineqartut, inissiisarfinni sulisut tapiinut atortussanngorlugit maanna isumaqatigiissutigineqarput.

Nunatsinni pineqaatissinneqarsimasunut inissiisarfinni sulisut suleqatiminnut danskinut akissarsiatigut nalimmassarnissaat anguniarlugu tapisiaqalertitsinissamut isumaqatigiittoqarpoq.

Paarnaarussivinni sulisut kattuffiat tusagassiorfinnut taama nalunaaruteqarpoq.

Kattuffup allattaa Rene Larsen, Sermitsiaq.AG-mut nassuiaavoq atorfeqarsimanerup sivisussusaa aallaavigalugu tapit aalajangersarneqarsimasut.

Inissiisarfinni sulisut maanna naatsorsuutigisinnaalerpaat ukiumut 84.500 koruunit missaannik, tassa qaammammut 7.041 koruunit missaannik akissarsiaqarnerulernissartik.

Tapit ukiumut ima isikkoqassapput:

  • Pineqaatissinneqarsimasunut inissiisarfinni sulisut piffissami aalajangersimasumi misiliutitut atorfinitsinneqarsimasut ukiumut 46.800 koruunit missaannik tapeqartinneqassapput.
  • Inissiisarfinni sulisut ukiumut 84.500 koruuninik tapeqalissapput.
  • Overanstaltsbetjentet atorfeqarsimanerup sivisussusaa aallaavigalugu 70.000-85.000 koruunit akornanni ukiumut tapeqassapput.

Rene Larsen ilisimatitsivoq vagtmesterit, overvagtmesterit, immikkoortortani pisortat isertitsivimmilu aqutsisut aamma akissarsiatigut qaffaavigineqassasut. Tapit soraarnerussutisiaqalernissamut katersinermi tapiliutitut aamma ilaassapput.

- Isumaqatigiissut ajunngilluinnartutut nalilerparput. Danmarkimi sulisut, tassa illoqarfissuit pingaarnersaanni sulisut, Kalaallit Nunaannilu sulisut akissarsiatigut assigiissarneqarput. Suliaq sivisuumik ingerlasimavoq. Isumaqarpungali inernerata utaqqisariaqarsimanera ajunngivissoq, angusarpummi naammagisimaarparput, kattuffimmi allattaasoq, Rene Larsen oqarpoq.

38 mio. koruunit isumaqatigiissutaasut

Inatsisinik atuutsitsinermut ministeri, Nick Hækkerup aamma folketingimi ilaasortat marluk, Aki Matilda Høegh Dam (S) aamma Aaja Chemnitz Larsen (IA) ukioq manna isumaqatigiissuteqarput nunatsinni pineqaatissinneqarsimasunut inissiisarfinni sulisut akissarsiatigut pitsanngorsaavigineqassasut.

Pitsanngorsaanissamut aningaasat 38,4 milliuunit koruunit ukiuni sisamani tullerni atortussatut illuartinneqarput.

Aningaasat illuartinneqarput ataatsimiititaliaq Kalaallit Nunaanni Danmarkimilu inissiisarfinni sulisut akissarsiatigut nikingassutaannik misissuitinneqareerneranni paasinarsimmat Kalaallit Nunaanni isertitsivimmi sulisut qaammammut 4.500 koruuninik danskini suleqatiminnit akissarsiakinnerusut.

Kattuffimmi allatsi ilisimatitsivoq akissarsianut tapit sapaatit akunneri sisamat arfinillilluunniit missaat qaangiuppata sulisunut agguaallugit naammassisimalissasut. Akissarsianummi tapit pinerluttunik isumaginnittoqarfimmit naatsorsorneqassapput, sulisut ataasiakkaat qanoq sivisutigisumik atorfeqarsimaneri aallaavigalugit.

- Naatsorsuutigaara tapit juullertinnagu tunniunneqarsimassasut, oqarpoq.

Powered by Labrador CMS