Inissiisarfimmi tigummigallagaq qimaasimasoq navianaatilik politiinit ujaarineqartoq
Tigummigallagaq toqutsinermik suliami pineqaatissinneqarsimasoq Sisimiuni pineqaatissinneqarsimasunut inissiisarfimmit tallimanngornermi ullaakkut qimaavoq. Sumiiffigisinnaasaannik paasissutissat suulluunniit politiinit soqutigineqarput.
Politiit tigummigallakkamik qimaasimasumik ujaasipput.
Pineqartoq tassaavoq 27-nik ukiulik Jonas Enoksen, Sisimiuni pineqaatissinneqarsimasunut inissiisarfimmit tigummigallagaaffigisaminit tallimanngornermi ullaakkut qimaasimasoq. Jonas Enoksen toqutsinermik suliami pineqaatissinneqarsimavoq.
- Jonas navianaarteqartutut nalilerparput, siumoraannilu nammineerluni tigusariniarneqassanngitsoq qinnutigalugu, imaluunniit sumiinnersoq ilisimagaanni politiit saaffigineqassapput, Kalaallit Nunaanni Politiit tusagassiuutitigut nalunaarummi allapput:
- Taamatuttaaq sumiiffiginissai pillugit paasissutissat tamarmik uagutsinnut soqutiginaateqarput. Innuttaasullu qinnuigissavavut umiarsualiveqarfik umiatsiaatitillu alaatsinaaqqullugit.
Ilisarnaatit immikkuullarissut
Jonas Enoksen oqaatigineqarpoq tassaasoq:
Angut, 27-nik ukiulik, kalaalerpaluttoq, 160-170 cm-inik angissusilik, timimigut nalinginnaasumik isikkoqartoq. Qimaanermini tungujortumik kavaajaqarpoq, qasertunik qarleqarluni aamma qernertunik/qorsunnik skooqarluni.
Politiit erseqqissaatigaat, ujaarineqartoq toqqoqqarneranut arlaatigulluunniit ikioraanni tamanna pineqaatissiissutaasinnaammat.
Kalaallit Nunaanni Politiit saaffigineqarsinnaapput oqarasuaat 70 14 48 aqqutigalugu.