Inissiisarfimmi paarsisut aamma politiit aningaasarsiaqarnerulilersut
Isumaqatiginninniarnerup aappaa naammassereersoq isumaqatigiittoqarpoq. Aningaasaliinissaq qanoq inissinneqassanersoq suli inissinneqanngilaq
Kalaallit Nunaanni inatsisinik atuutsitsinermut tunngasut pitsaanerulersinniarlugit 50 million koruunit illikartinneqarput aningaasanut inatsimmi.
Taakku ilaatigut inissiisarfinni paarsisut aamma politiit aningaasarsiaat amerlanerulernissaannut atorneqassapput.
Folketingimi ilaasortat marluk peqatigalugit ippassaq isumaqatiginninniartoqarpoq aningaasat qanorpiaq atorneqassanersut.
- Aningaasarsiat naligiinnerulernissaat anguniarlugu folketingimi ilaasortaatillunga oqaatigiuarpara. Maanna isumaqatiginninniarnerup aappaa naammassivoq, isumaqatigiissut ulluni qaninnerpaani atsiorneqarnissaa naatsorsuutigaara, IA-mit Aaja Chemnitz Larsen oqarpoq.
Aningaasarsiat amerlineqarnissaat pillugu isumaqatigiittoqartoq Sermitsiaq.AG-mit paasineqarpoq. Aningaasat allat sumut atorneqassanersut suli isumaqatiginninniutaavoq.
- Isumaqatiginninniarnerit ullumi naammassineqarnissaat neriuutigigaluarpara, tassami politiit aamma inissiisarfinni paarsisut siunissartik pillugu qulakkeerneqapallannissaat neriuutigigaluarakku.
Inissiisarfinni paarsisut ilinniarnerat aamma aningaasaliiffigineqassasoq IA-mi ilaasortaq isumaqarpoq.