Skip to main content

Inissiat iikkap kumaqalersimasut

Aasianni inissiat arlallit iikkap kumaqalersimapput. Iikkap kumai ataasiakkaaginnaariarlutik uuntritilinngupallattarmata, iikkat kumai nungutikkuminaatsuupput.

Illumi nammineq pigineqartumi Daana Geisler meeqqanilu marluk najugaqarput. Angerlarsimaffialli iikkap kumaqalersimammat maanna allami najugaqartariaqarput.

Ilisimaatsoornermini angerlarsimaffimminut iikkap kumaanik eqqussisimavoq, ilisarisimasaminut madrassimik atorniarnermi kingorna.

- Unnuit ilaanni paniga sinittoq eqqaani innagallunga malugilerpara qitikkut kapiteqattaarlunga. Tunummut qiviarama takuakka uumasuaqqat iikkami aalaaluttut. Tupallunga qisuariapiloorama uumasuaqqat taakku tarripallapput, Daana Geisler Sermitsiaq.AG-mut oqaluttuarpoq.

Taassuma nammineerluni erseqqissaatigaa angerlarsimaffik nammineq pigineqartuusoq attartorsimallugu. Ilisimallugulu iikkap kumai pillugit ajornartorsiut nammineerluni akiorniartussaallugu.

Væggelus, der er fundet i et privat hjem i Aasiaat.
Privatfoto / assi nammineq pigisaq

Iikkap kumai uumasuaraapput inissianiittartut. Sukkasuumik amerliartortarput sumiiffik pitsaalluinnaraangat arnaviaq ataatsikkut 200-nik manniliorsinnaasarami. Uumasuaqqat inuup illumiluunniit uumasut aavinik aattorlutik uumasarput. Inissiat killigini putuiniluunniit, kiisalu pisattani toqqoqqasinnaasarput, aattussagaangamillu unnuakkut aatsaat toqqoqqaffimminnit anillattarlutik.

Assit Sermitsiaq.AG-p pissarsiarisimasai aallaavigalugit pinngortitaleriffiup uppernarsarpaa uumasuaqqat pineqartut tassaasut iikkap kumai. Pinngortitaleriffiup ilanngullugu uppernarsarpaa uumasuaqqat taakku pilluguit innuttaasut arlallit saaffiginnittareersimasut, siulliillu 2015-imi saaffiginnissimasut.

Pisattat arlallit atorsinnaajunnaartut

Daana Geisler meeqqani marluk najugaqatigai. Kisimiittuuvoq Aasiannullu siorna nuulluni.

Pisattani amerlarnerpaartai annaasussanngorpai, iikkap kumaami iikkaniiginnartanngillat, aammali pisattaniillutillu atisaniissinnaasarlutik.

- Siniffiit, issiavissuit, nerriviit, atisat, atuakkat meeqqallu pinnguaat. Tamakku silamut annissuuppakka. Taakku tamaasa ikuallassavakka, annaanneqarsinnaanngillat, oqaluttuarpoq.

Pigisat igitassat saniatigut paasissutissat atuarlugit paasisimavaa atisat annoraamerngillu allat sivikinnerpaamik ulluni pingasuni qerititsivimmiisinneqassasut, iikkap kumaasa​​​​ mannii toqutserlugit.

Inissiaq tamakkerlugu eqqiarneqassaaq, teqeqqut tamaasa putuaqqallu iikkap kumaqarsinnaasut tamarmik støvsugeqqissaarneqassapput, iikkap kumaalu nungusarniarlugit eqqiaassutit sakkortuut atorneqarsinnaallutik. Inissiarli iikkap kumaanik peqalersimappat, nungutitsinissaq ajornaatsuinnaanngilaq. Nungutitsiniaraanni arlaleriarujussuarluni eqqiaasoqartariaqarpoq. 

- Paasisakka naapertorlugit illoqarfitsinni uumasuaqqanik toqoraasinnaasunik sulisoqanngilaq. Tamanna isumaqarpoq nammineerlunga akiuiniartariaqassasunga, Daana Geisler oqarpoq.

Allami najugaqarallartut

Daana Geislerip pisattani amerlanerpaartai annaasussanngorpai.

Madrassit ilai, igaffimmi pisattat anginerit atisamerngillu kisiisa iluatigisimavai. Uumasuaqqat nungupallakkumallugit pisattani amerlanerpaartai igiinnarniarlugit aalajangersimavoq. Aammali qujamasuuteqarpoq.

- Qujamasuppunga suli sumiiffissaqaratta. Inigisarput iikkap kumaanik peqarunnaarpat nutaanik pisatartaartorniarumaarpunga. Unali uggoraara nunatsinni iikkap kumaqartoqarsinnaaneranik paasissutissaqanngiivimmat. Taamaattunik nassaaratta qanoq qoqassinneqarujussuarpugut, oqarpoq.

Daana Geislerip iikkap kumai suunersut aatsaat paasivai. Daana Geislerilli ulluni kingullerni paasisai naapertorlugit angerlarsimaffiit arlaqarsinnaasut iikkap kumaanik peqalereersimasinnaapput.

Pisortat inissiaataanni iikkap kumaanik peqalersimasuni ineqartut Sermitsiaq.AG-p attaveqarfigerusuppai.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER