Inissiat akisuut peqqinnissaqarfimmut aningaasartuutaasut
Peqqinnissaqarfik Nuummi sulisuminut arlalinnut namminersortut inissiaataannik attartortarpoq. Attartortarneq peqqinnissaqarfiup sulisut ineqarnerannut akiliutigisartakkagaata marloriaataat sinnerlugit akeqartarpoq. Peqqinnissaqarfik taamaammat inissianik amerlanerusunik sanaartortitsiniarpoq.
Peqqinnissaqarfik pingaartumik Nuummi sulisut inissaannik pissarsiniartarnermik unamminartoqartitsivoq, tamannalu pisariaqartilluinnakkanik sulisussarsiniartarnermut sulisunillu attassiinnarniarnermut sunniuteqartarpoq.
Peqqinnissaqarfik taamaammat sulisut ilaasa inissaannik pissarsiniarluni namminersortunut attartortarpoq. Ineqarnermulli sulisut akilertagaat, peqqinnissaqarfiup ininut akiliutigisartagaanut matussusiisinnaanngillat.
Peqqinnissaqarfik taamaammat inissanik 60-inik Nuummi sulisut atorsinnaasaannik sanaartortitsinissamik pilersaaruteqarpoq.
Tamanna takuneqarsinnaavoq, Peqqissutsimut Naalakkersuisup Anna Wangenheimip (D) paragraf 37 naapertorlugu apeqqummut akissutaani.
Namminersortunut attartortarneq akisooq
Naalakkersuisup ilisimatitsissutigaa, Peqqinnissaqarfik inimik attartorsimasoq sulisunut attartorteqqinneqarsimasumik.
Peqqinnissaqarfik kvadratmeterimut qaammaut 161,27 koruuninik akiliisarpoq, attartukkamili kvadratmeterimut 61,08 koruuniinnarnik pissarsisarluni.
Tamatuma saniatigut peqqinnissaqarfik ininik pingasunik katillugit attartortunut 18-inut inissalimmik attartugaqarpoq.
Inissiat taakku utaqqiissaasumik initut atorneqartarput, tassani sulisut akeqanngitsumik ineqartitaanerup nalingata akileraarutaanut akiliisarput. Init sulisut attartukkamut akiliuteqarfigisartagassaattut sivikitsumik attartorneqarsimappata, taava tamanna imminut akilersinnaanngilaq.
Sulisunut inissat 60-it sananeqassasut
Ajornerpaamik pisoqassappat peqqinnissaqarfik sulisup attartornerani qaammaammut kvadratmeterimut 54,79 koruuninik pissarsisassaaq, illuatungaatigulli peqqinnissaqarfik kvadratmeterimut 215,41 koruuninik akiliuteqartassalluni.
2021-mut aningaasanut inatsisissatut siunnersuut naapertorlugu, peqqinnissaqarfik namminersortunut attartornermini katillugit 300.000 koruunit missaannik qaammammut akiliuteqartarpoq.
Aqqaluaq B. Egede IA-meersoq Anna Wangenheimimut apeqquteqartuusimavoq, taassumalu paaserusussimavaa, Naalakkersuisut niuertunut ilaannut iluatatsitsiniarnersut imaluunniit inissianik amerlanerusunik sanaartortitsilersaarnersut.
Anna Wangenheimip oqaatigaa niuertut ilaannut iluatatsitsiniartoqanngitsoq aamma sulisutinissaannik sanaartortitsinissamik Naalakkersuisut pilersaaruteqartut:
- Inissat namminersortunit attartukkat taamaatinnerisigut aningaasartuutaasussaagaluit sipaakkat kiisalu 2022-imiit ukiumut 3 mio koruunit aningaasaliissutaasussat ilanngullugit, sulisut inissaannik 60-inik sanaartortoqarsinnaanissaa, taamaaliornikkullu inissiat amerlisinneqangaatsiassasut naliliisoqarpoq, Anna Wangeheimip Aqqaluaq B. Egedemut akissuteqaataani allassimavoq.