Inissianut suliniuterujussuaq piareersarneqartoq

Inissiat 160-t sanaartorneqarnissaat, aamma meeqqeriviliornissaq kiisalu asiartarfittut ornittakkanik ilaatigut Qinngutsinni sissaq sinerlugu aqqusiornissaq.

Sanarfinermut Avatangiisinullu Ingerlatsivik suliassatut nutaanik inissialiornissamut atugassamik nunaminertamik atuinissamut immikkoortitsiffigineqarnissamik qinnuteqaammik tigusaqarpoq, taanna ullumi ualimut aningaasaqarnermut ataatsimiititap ataatsimiinnerani suliarineqassaaq.

Sanarfinermut Avatangiisinullu Ingerlatsiviup nalilerpaa suliassaq Illoqarfiit pingaarnersaannut periusissiamut kommunimullu pilersaarummut naapertuulluinnartuusoq, tassani inissiat assigiinngitsut neqeroorutigineqarmata. Ingerlatsivik taamaallaat inissiat suliarineqarnissaannut tunngasumik iluarsisaqalaaginnarput, ”taamaasilluni siunissami attartortunngortussanut tamakkiisumik aaqqiissutissaq pitsaanerulerniassammat”, suliami kommunimi politikerinut aningaasaqarnermut ataatsimiititami ilaasortanut saqqummiunneqartumi tamanna atuarneqarsinnaavoq.

Inissialiorfissaq nutaaq, Mitsimmavimmik taaguuteqartoq, 8,4 hektarinik annertussuseqarpoq, 500-nillu najugaqarfigineqarsinnaalluni, sanaartunerup aasamut aallartinneqarnissaa pilersaarutaavoq, 2024-milu piareerneqassalluni.

Tamannali pitinnagu suliaq aningaasaqarnermut ataatsimiititamit akuerineqaqqaassaaq, kommunalbestyrelsimullu ingerlateqqinneqarluni, kingornalu sapaatip-akunnerini arfineq-pingasuni tusarniaaneq ingerlanneqassalluni.

Illussanik titartaasarfik tnt nuuk takusassiatut saqqummiussaani aallarniutitut ima allaqqasoqarpoq:

- Inissialiorfissami nutaami Nuummi nutaamik aamma pilerinartumik inissiaqarfimmik titartarluakkamik, immikkut ittumik pilersitsinissaq anguniarneqarpoq.

Sanaartugassanut ilaapput illut quleriiaat, inissiat portusuut kipparissumik toqqavillit, uiguleriiaat aamma illut angisuut.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...