Inissianik iluarsartuussinermut piumasaqaatit nutaat atuutilissapput
Inissianik iluarsartuussisarnermut piumasaqaatit Naalakkersuisut sukaterniarpaat. Tamanna pitsaasuuvoq, pingaartumik nunatsinni uuliap kiassarnermut atorneqartarnera eqqarsaatigalugu, lektori oqarpoq.
Siunissami inissiat iluarsartuunneqartarnerinut piumasaqaatit sukanganerulissapput, Naalakkersuisut taama siunnersuuteqarput.
Inissiaqarfiit pioreersut nalinginnaasumik aserfallattaaliorneqarneri ilutigalugu nukinnik atuinerup annikillisarneqarnissaanik siunertalimmik, inatsisissatut siunnersuut tusarniaassutigineqarpoq.
Sanaartorneq pillugu inatsit aserfallattaaliuinermik iluarsartuussinermillu suliaqarnermut aamma atuutilersinneqarneratigut tamanna pissaaq, inissianillu piginnittut 'sanaartukkani atortut atortorissaarutillu taarserneqarnissaanni atortunik atortorissaarutinillu nukimmik atuinermut pitsanngorsaataasunik' atuisassapput.
Periarfissaq annertooq
Suliassaqarfimmi inatsisit Naalakkersuisut sukatertussanngormatigit suliniut pitsaasuuvoq, DTU-mi lektori, Tove Lading, issittumi sanaartornermi immikkut ilisimasalik, nunatsinnilu inissiaqarfinnik illunillu ilisimatusarsimasoq naliliivoq.
Nukissamik atuinermut tunngatillugu aammalu CO2-mik aniatitsinermi annertuumik sipaarutissaqartoq, taassuma Naalakkersuisut isumaqatigai:
- Nukissamik sipaarnissamut periarfissaq annertoorujussuuvoq, Kalaallit Nunaatalu tamanna pimoorussiffigisariaqarpoq. Pingaartumik uulia kiassarnermut taama annertutigisumik atorneqartarmat, Tove Lading oqarpoq.
Nunatsinni inissiat ataavartumik oqallisigineqartarput, pingaartumik Namminersorlutik Oqartussat inissiaataanni milliardit nalinginut iluarsartuussinissamut kinguleruttoqarmat.
Aporfiunavianngitsut
Piumasaqaatit nutaat inissianik iluarsartuussinissamut annerusumik aporfiunavianngitsut, Tove Lading naliliivoq:
- Ajornartorsiutitut isiginngilara, iluarsartuussinermi nukissanik sipaaruteqarniarneq amerlasuunut akisuneq ajorpoq. Assersuutigalugu igalaanik taarsersuigaanni, taava taarsiullugu igalaanik nukissamik sipaarniutaasunik ikkussisoqartillugu pitsaasuusarpoq, Tove Lading oqarpoq.
Oqorsaatini silarlerni iluaqutissat annertunerusarput, tamannalu aamma eqqarsaatigineqartariaqarpoq:
- Inissiami oqorsaatit 0-mit 200 mm-erinut inissinneqarpata, nukissanik sipaarutip 75 procentii oqorsaatini siullerni 50 mm-erini inissisimasarput, taanna nassuiaavoq, nangillunilu:
Inissianut nalunaarsuiffik pilersinneqassaaq
- 0-mit 100 mm-erinut annertusititsineq pissarsiffiungaatsiartarpoq, kisianni 200 mm-erinit appariartulertarpoq.
Inissiaqarfiilli pisoqaanerusut betonimik sanaat assersuutigalugu igalaalersorneqarnermit aamma saqqaanik nutarsaanermit annertunerusumik pisariaqartitsisinnaasut, Tove Lading oqarpoq. Tamanna sanaartukkani ussiittoqarneranik pissuteqarpoq. Tassuunalu nillertoq isaasarpoq.
Iluarsartuussinermut piumasaqaatit saniatigut inissianut nalunaarsuiffik BBR-ip pilersinneqarnissaanut inatsisissatut siunnersuut imaqarpoq – nunatsinni inissiat tamarmiusut digitalimik nalunaarsorneqarfissaat. Pisortani pisariinnerusumik ingerlatsinissamik ilaatigut qulakkeerinnissaaq.
Illuutit tamakkerlugit, matumani inissiat inuutissarsiorfiillu ataasiakkaat kiisalu teknikkikkut atortuutit illunut atasut ilanngullugit, ersarissumik nalunaarsorneqassasut naatsorsuutigineqarpoq.