Skip to main content

Inissialiornissarsuaq soraarnerussutisianut aningaasaateqarfinnit aningaasalersorneqassaaq

Oqaluttuarisaanermi nunatsinni illoqarfiup pilersaarusiorneqarnera svenskinit danskinit nunattalu piviusunngortinniarlugu aningaasalersussavaat. Pilersaarusiaq 4.-5. milliardinik naleqassangatinneqarpoq.

Marlunngormat Borgmesteri Asii Chemnitz Narup illoqarfiit pingaarnersaanni pilersaarusiamik saqqummiussivoq, pilersaarusiamilu sanaartugassat ilaatigut ukuupput inissiat 1600-ut, suliffeqarfiit, atuarfeqarfiit, ulluunerani paaqqinnittarfiit, sullorsuaq kiisalu issittumi arsaattarfik.

Atuaruk: Nunatta oqaluttuarisaanerani inissianut pilersaarut annerpaaq

Borgmesterip kikkunnit aningaasalersorneqassanersoq tusagassiortunut katersortitsinermi oqaatigerusussimanngilaa. Isumaqatiginninniarnerit pitsaasumik ingerlapput neriuutigaarput ukiup ingerlanerani isumaqatiginninniarneq naammassiumaartoq, sanaartornerlu 2018-imi aallartinneqarluni.

Takorluukkanit piviusumut
Kommuunilli aningaasaleqaataasussatut kissaataat kikkuunersut Sermitsiaq.AG paasisaqarsimavoq. Takorluukkalli piviusunngortinnissaanut aningaasaleeqataasussanut ilaapput svenskit danskit nunattalu ingerlatseqatigiiffiup ataasiinnaap pilersaarusiaq sanaartorneqassasoq Kommuneqarfiup paasissutissiaraa.

Ingerlatseqatigiit toqqarneqartut aningaasaliisullu saniatigut sanaartortitsineq suliffeqarfiit allat suleqatiginerisigut ingerlanneqassasoq aamma paasissutissiissutigaat.

Svenskit aningaasaateqarfissuat
Kommuneqarfik Sermersuup svenskit SEB-iit pilersaarusiamut tunngatillugu isumaqatiginniniarfigigaat paasinarsivoq. 

SEB naalisagaavoq Skandinaviska Enskilda Banken illoqarfiit pingaarnersaanni Stockholmimi qullersaqarfeqartoq 1856-imi ilaqutariit pisoorujuissuit Wallenberg pilersinneqarsimalluni. Aningaasaateqarfik milliarderpassuarnik kaaviiaartitaqarpoq inuilli 15.500-ut missaani sulisorineqarput aningaasaateqarfilli imminut taasarpoq "nunani avannarlerni aningaasaateqarfiit siuttuat".

SEB-lu kisimiillutik aningaasaleeqataassanngitsut Sermitsiaq.AG-iip paasisimavaa. Danskit utoqqalinersianut ileqqaarinniffi marluk ATP aammalu AP Pension kiisalu nunatsinni utoqqalinersianut ileqqaarinniffik SISA isumaqatiginninniarnermut ilanngunneqassasut pilersaarutaavoq.

ATP pigisanik nalilinnik anigaasaliinererusuppoq
ATP 1964-imiilli danskit sulisartuisa soraarnerussutisianut ileqqaarinniffimmut akilersuutaasa ernialersornerat ernialersornerallu isumagisaraat. Danskit aningaasaateqarfiat 2016-imi 15,3 milliardinik iluanaaruteqarpoq.

Suliffeqarfik aningaasaliinissamut periarfissaqarluarmat sanaartornissamut aningaasaleeqataarusussuseqartoq marlunngormat ATP-iip  pisortaanerata Christian Hyldahlip paasissutissiaringaa nittartakkatigut nutaarsiassaqartitivik EjendomsWatch.dk taama allaaserinnippoq.

AP Pension
AP Pension tassaavoq soraarnerussutisianut ileqqaarinniffik taannallu 4,5 procentit missaanik tuniniaaviup ilaani pigisaqarluni, Danmarkimilu utoqqalinersianut ileqqaarinniffinni arfineq aappaattut annersaattut inissisimalluni. Tassa AP Pensioni 100 procentimik namminersortuuvoq aningaasaliiniaraangamilu sukkanerpaamik aningaasat amerliartorfigisinnaasaanni aningaasaliisarlutik, suliffeqarfiummi ileqqaarinniffimmi atuisuusut iluanaaruteqarluarnerunissaat angorusuttarpaat.

SISA saaffigineqarsimavoq
Sulinermik Inuussutissarsiuteqartut Soraarnerussutisiaqalernissamut Aningaasaateqarfiat peqataatinneqarusuppoq.

Soraarnerussutisiaqalernissamik aaqqissuussineq SIK-p pisortat namminersortullu suliffeqarfiisa akornanni akissarsiat pillugit isumaqatigiissutit najoqqutaralugit pilersinneqarsimasoq. Suliffeqarfiit 200 sinnerlugit amerlatigisut sulisumik soraarnerussutisiassaannik ikioraapput. Aningaasaateqarfik 33.080-nik ilaasortaqarpoq, taakkunannga 16.000-it suli ikioraasuullutik, sinnerilu ikioraajunnaarsimallutik, aningaasaateqarfik nittartakkaminni taama paasissutissiivoq.

Atuaruk: Titartaasartup tusaamasap issittumi arsaattarfissuaq titartarpaa

Qaammatialuit matuma siorna ataatsimiigiaqqussummik saaffigitissimavugut SISAp siulersuisuuneranni siulittaasoq Jess G. Berthelsen Sermitsiaq.AG-mut paasissutissiivoq.

- Suli piviusunngunngilaq. Pilersaarusiamulli aningaasaleeqataassagutta ilaasortatta iluanaarutigisinnaaneraat misissorneqassaaq inerniliisussaallunilu, Jess G. Berthelsen erseqqissaavoq.

Sermitsiami Sammisaq

Nunatta oqaluttuarisaanerani illoqarfiup ineriartortinneqarnissaanut pilersaarusiaq aviisimi Sermitsiami saqqummertumi kingullermi atuakkit. Sammisat qulequtaat:

  • Nunatsinni pilersaarutit annerpaartaat aallartinneqartoq
  • Nuuk alliartupiloortoq
  • Asii: Unittoorsimavugut 
  • Aningaasalersuinissaq inissinneqanngilaq 
  • Nuna tamakkerlugu siuariartornermik pilersitsissasoq
  • Sulisussat piginngilavut 
  • Allaaserisaq pingaarneq: Inuiaqatigiit tamarmik peqataassapput 

Linki toorlugu aviisi pissarsiariuk:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER