Inissialiornissamik pilersaarut ingerlalluartoq

Nuup Qinnguani inissiassat 95-it aamma inuussutissarsiorfittut attartorneqarsinnaasut pingasut titartarlugit ingerlanneqarput, pilersaarullu kommunimi aningaasaqarnermut ataatsimiititamit maanna akuerineqarsimalluni.

Inissialiassat Illussanik titartaasarfimmit Biosis-imit titartarneqarsimapput. Permagreenimit piumasarineqarsimavoq, inissiat tamarmik kangerliumanermut isikkiveqassasut. Innuttaasut marluk sanaartorniakkat tunuatungaanik blokkini najugallit pilersaarummut akerliusimapput.

Namminersortup inissialiortiternissamik pilersaarutaa annertooq Kommuneqarfik Sermersuumi akuersissutigineqarpoq.

Sanasutut suliffeqarfik Permagreen Grønland inissialiortiternissamik pilersaaruteqartuusoq, inissiassat Nuup Qinnguaniinnissaannik kissaateqarsimavoq. Inissiassat Suloqqami inissiarsuit marluk aamma Unaami pukkinnerusunik inissialiorfiusimasup akornanni inissisimassapput.

Inissianik 96-inik aamma inuussutissarsiorfittut attartorneqarsinnaasunik pingasunik sanaartornissamik pilersaarut imaqarpoq, pilersaarullu sapaatip-akunnerata siuliani Kommuneqarfik Sermersuumi Aningaasaqarnermut Inuussutissarsiornermullu Ataatsimiititamit akuersissutigineqarluni.

Permagreenimi pisortaanerup Jeppe Bloch Steffensenip pilersaarut ataatsimiitamit akuersissutigineqarnera mianersortumik nuannaarutigaa, kommunalbestyrelsimilu suliarineqarnissaa qilanaaralugu:

Aningaasassat inissinneqassasut

- Suliaq naammassitinnagu tunisaqassanngilagut, ataatsimiititamilli pilersaarutip akuerineqarnera siuariarneruvoq, taanna oqarpoq.

Jeppe Bloch Steffensenip ilanngullugu oqaluttuaraa, Permagreenimit pilersaarut aallartisarneqartoq, tassa kommunalbestyrelsip tamarmiusup pilersaarut akuersissutigissappagu suliffeqarfik pilersaarummik ingerlatitseqqinnissamut piareersimaniassammat.

- Pilersaarusiornitsinni siunnersortivut sapaatip-akunnerata tulliani ataatsimeeqatigissavavut, tassa suliassat aallartisassallutigit. Pilersaarummut aningaasassat inissinniarlugit sukumiinerusumik pilersaaruteqartariaqarpugut.

- Pilersaarut aningaasatigut imminut akilersinnaanersoq nalilersorsimavarput, aningaasaqarnerlu erseqqinnerusumik nalilersussavarput, tamatumalu kingorna aningaasaliisussarsiussalluta. Maannakkut tamatumunnga killissimavugut, Jeppe Bloch Steffensen oqarpoq.

Suloqqami najugallit akerliusimasut

Pisortaanerup oqaatigaa, Permagreenimit inissiat ataasiakkaarlugit tuniniarneqassanersut imaluunniit suliffeqarfik aningaasaliissuteqartartumik inissianik attartortitserusuttumik suleqateqalissanersoq suli inaarutaasumik aalajangiunneqanngitsoq.

Pisortaaneq naapertorlugu, pilersaarummi nutaami illutassat ilaat titartarniarneqarsimasut, inissiat tamarmik kangerliumanermut isikkiveqartinniarlugit.

Taamaammat sanaartugassaq 4-6-inik quleriilinnik assigiinngitsunik angissusilinnik initaqassaaq Suloqqamilu inissiat pioreersut assigissanngilaat. Inissiat 55 aamma 135 kvadratmeterit akornanni angissuseqassapput.

Kommunip ingerlatsivia suliniut pillugu allappoq, at "pilersaarummi annertuut pineqaraluartut Suloqqami inissiat pioreersut isikkiveerunneqannginnissaat pilersaarusiornermi iluatsilluarsimasoq."

Immaqa - aappaagu sanaartorlugit aallartinneqassasut

Tusarniaanermi akissutinili takuneqarsinnaavoq, Suloqqami innuttaasut marluk sanaartortoqarnissaanut akerliusimasut, isikkivigisamik killeqalernissaat ernummatigigamikku:

- Isertugaataanngilaq najugaqartut ilaasa isikkiviisa killeqalernissaat, tamannali pillugu kommuni aamma oqaloqatigisimavarput. Illoqarfik alliartorpoq, inissanillu pisariaqartitsisoqarluni, kommunimiillu nalunaarfigineqarsimavugut sanaartornerit ingerlatiinnassagivut.

- Suliap maanna killiffiani sanaartugassat tunuanni najugaqartut pitsaanerusumik inissisimatinnissaat pillugu arlaatigut iliuuseqarsinnaanerluta. Imaassinnaavoq tamanna qulakkeerniarlugu sanaartugassaq ataaseq allaluunniit allamut nuukkipput, Jeppe Bloch Steffensen oqarpoq.

Pisortaanerup oqaatigaa, pilersaarut kommunalbestyrelsimit akuerineqassappat, sanaartorneq siusinnerpaamik aappaagu aallartinneqassasoq

- Aningaasaqarnikkut inissisimaneq tamarmiusoq takusinnaaniarlugu ukiup 2022-p sinnera atorlugu pilersaarusiorneq naammassiniassavarput. Ukioq 2023 aningaasaliissutissat sullitassallu qulakkeerneqarnissaannut atorneqassaaq. Pilersaarutit ajunngitsumik ingerlappata 2023-mi aallartissinnaanngussaagut. Imaassinnaavorli aatsaat 2024-mi sanaartorneq aallartinneqartoq.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS