Inissialiorneq: Qisuk Nunatsinnut kusanarneruvoq
Nuukullaap Klondykemit illoqarfiup immikkoortuatut pilerigineqarnera ingerlaqqippoq.
Illuutinik ineriartortitsisartup Vagn Andersenip Nuummi inissiat allaffeqarfiillu arlallit Nuummi ukiuni makkunani sanaartortippai, tamatumani tunngavigineqarlutik sanariikkat katiteriaannaat qisuusut, Fynimi suliffeqarfimmit Taasinge Elementerimeersut. Aviisi Sermitsiaq allappoq.
– Siunertarisara tassaavoq avatangiisinut mingutsitsinngitsunik, sapinngisamik amerlanerpaanik akitigut peqataaffigineqarsinnaasunik sanaartornissaq, Vagn Andersen Sermitsiamut oqarpoq.
– Qisuit pitsaanerusumik kissassimaartitsisarput illullu ilua silaannarinnerusarluni aamma qisuit betonngimit minneroqisumik CO2-mik mingutsitsisarlutik. Qisuit aserfallatsaalineqartariaqarput, aammali betonngit taamaallutik; taamaanngippammi inissiarsuatoqqani aserfallatsaaliinerit taama annertutigisut takusarsimassanngikkaluarpavut. Aamma katiteriaannarnik sanaartorneq qangatut betonngimik sanaartornermit sukkanerusumik sanaartorneqarsinnaavoq, tamannalu illoqarfimmi inissianik amigaateqarfioqisumi iluaqutaavoq .
Isornartorsiuisut tikkuarpaat, katitigassanik sanaartornermi sanaartukkap akiata ilarujussuanut sulisorineqartunullu Danmarkimiittunut atorneqartarmata, kisianni pisarnertut betonngimik sanaartornermi kaaviiaartitat amerlanersaat sulisorineqartullu nunaqavissunut sanasunut sanaartugassanillu suliakkerneqartartunut atorneqartarlutik. Aammali maluginiarneqartariaqarluni Nunarput sanaartugassanik nammineerluni nioqqutissiortuunngimmat, aamma qisuit betonngillu avataanit tikisinneqartariaqarlutik .
Vagn Andersenip Nuummi Niels Hammekensvejimi katitigassanik sanaartorneq ulluni makkunani aallartippaa. Sanaartugassamut tamarmiusumut missingersuutit katillugit 30 millionit koruunit sinneqalaarput, sanaartornermilu atortussanut aningaasartuutit 10 procentiullutik .
– Nassuerutigissavara qisummit sanaat asannilersoorfigisorujussuugakkit. Qisuk Kalaallit Nunannut Issittumullu kusanartuuvoq aamma taama nuannarinnittut amerlaqaat, nammineerluni illuliat takuinnarsinnaavasi, Vagn Andersen oqarpoq .
Oqaluttuaq tamaat sapaatip akunnerani matumani Sermitsiami atuaruk. Iserfigisinnaavat, uani:
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
