Inissarsinissamut allatsissimasut amerlingaatsiarsimasut
Nuummi inissarsinissamut allatsissimasut ukiut tallimat ingerlaneranni 42 procentimik amerleriarsimapput, illoqarfiillu pingaarnersaanni inissaaleqisoqarnerujussuanut tamanna takussutissaavoq.
Kommuneqarfik Sermersuup inissiaatileqatigiiffia Iserit A/S aqqutigalugu innuttaasutut initaarusukkaanni naammagittarluartariaqarpoq.
Ukiut tallimat matuma siornatigut inissarsiortutut allatsissimasut 1.457-iupput, ukioq mannalu februaarip naanerani allatsissimasut 2.076-inngorsimallutik, naak kommuni piffissami sivisuumi attartortitassaqartitsiniarluni inissialiortitsinernik annertusaasimagaluartoq, kommunilli inissiaatileqatigiiffiullu inissialiortitsinerat Namminersorlutik Oqartussanit unitsinneqarsimavoq. Unitsitsineq politikkikkut aaqqiagiinngissutaalersimasoq kommunimut qineqqusaarnermi sakkortuumik oqallissutigineqarpoq.
Ukiut tallimat ingerlaneranni inissat nutaat 500-t
- Oqaatigineqassaaq, ukiut tallimat ingerlaneranni inissat nutaat 500-t missaanniittut atuutsilersimagatsigit, Iserimmi pisortaq torben Kortegaard Sermitsiaq.AG-mut oqarpoq. Inissat 500-t taakku kommunitp tamakkiisumik aningasaliiffigisimavai sanasullu namminersortut peqatigalugit piffissami sivisuumi attartortissimallugit.
Inissarsinissamut agguaqatigiissillugu utaqqineq ullumikkut ukiut aqqanillit missaannik sivisutigisarpoq, pisortaq ilisimatitsivoq.
Illoqarfiit pingaarnersaanni innuttaasut ukiumiit ukiumut amerliartorput, inissaaleqisoqarneralu pissutigalugu Iserit 2020-mi neqeroortitsinermi sinaakkutissanik isumaqatigiissuteqarpoq, tassani sanaartortartutut suliffeqarfissuit kommunimi inissialiornissamut ukiuni sisamani atuuttussamik isumaqatigiissuteqarfigineqarsimapput.
Ukiut sisamat ingerlaneranni ukiumut inissat 50-t
EMJ Atcon Greenland neqeroortitsinermi ajugaasimapput, taamalu ukiut sisamat ingerlaneranni ukiumut inissanik 50-t missaanniittunik sanaartortussaallutik.
- Sanasut ataavartumik suliaqarnissaannut qulakkeerinnittumik sinaakkutissatut isumaqatigiissuteqarnermi anguniagaavoq "unitsitsillunilu ingerlaqqittarnerup" pinngitsoortinneqarnissaa, ukiullu marluk matuma siornatigut piffissamut sivisuumut pilersaarusiortarneq aallartinneqarpoq, siunertaavorlu ukiut sisamat qaangiuppata inissarsiornerup nalilersoqqinneqarnissaaq nutaamillu sinaakkutissatut isumaqatigiissusiornissaq, Torben Kortegaard nassuiaavoq.
Taassuma ilisimatitsissutigaa, taamatut periusissiornikkut inissiaatileqatigiiffiup, Nuummi illuliortitsinermi nalinginnaasumik akeqartitsisarnermut sanilliullugu 30 procentimik akikinnerusumik akeqartitsinissaa, tamatumanilu piffissami sivisuumi isumaqatigiissuteqarnermi iluaqutissat pissutaasut.
- Iluaqutissaq alla tassaavoq, tamatumunnga peqatigitillugu piumasarisimagatsigu, sanaartorneq attanneqarsinnaanerussasoq aamma FN-ip Nunarsuarmi anguniagaanik naammassinnittuussasoq, Iserimmi pisortaq oqarpoq.
Soraarnerussutisiaqarnissamut aningaasaateqarfiit utaqqisut
Torben Kortegaardip neriuutigaa, Namminersorlutik Oqartussanik aaqqiagiinngissuteqarneq qaangerneqassasoq, Danmarkimimi soraarnerussutisiaqarnissamut aningaasaateqarfiit arlallit Kalaallillu Nunaanni SISA utaqqipput aningaasaliissuteqarusullutillu, Nuummi initaarussuttoqarluarnera aningaasaliiffissatsialaammat.
- Soraarnerussutisiaqarnissamulli aningaasaateqarfiit inissianut aningaasaliissuteqarnissamut maleruaqqusat erseqqissaaffigineqarnissaat utaqqimaarpaat, Torben Kortegaard nassuiaavoq. Taannalu isumaqarpoq, inissialiortitsinermut atatillugu aaqqiagiinngissutaasoq qaangiuteriarpat, ukiut arfinillit tulliuttut ingerlaneranni Danmarkimi soraarnerussutisiaqarnissamut aningaasaateqarfiit aningaasaliissuteqarnerisigut ikinnerpaamik inissanik 600-nik sanaartortoqalerumaartoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...