Inissara eqqortoq nassaarivara
Heidi Schermer imminut nunasisimasutut isiginngilaq. Kangerlussuarmi ukiut 20-t sinnerlugit najugaqarsimanermigut immikkut pisinnaatitaaffeqartutut misigisimavoq, inuiaqatigiinnguit imminnut qanittut, pinngortitap inuillu imminnut qaniffigisaat, najugaqarfigalugu nuannarilluinnaramiuk.
- Oqaluttuassartara allarpassuit oqaluttuassartaattulli eqqumiitsigaaq.
Heidi Schermerip Kalaallit Nunaannik naapitseqqaarnini AG-mut Kangerlussuarmit oqarasuaatikkut oqaluttuaraa, tassanimi Air Greenlandimi stationslederitut suliffeqarpoq.
Takornarianut angallassisartutut sulisussanngornini Heidip 2000-imi aasakkut timmisartumik Kalaallit Nunaannukarnerminut pissutigisimavaa. Kalaallit Nunaat timmisartorsuarmiitilluni atuarsinnaasami saniatigut annertunerusumik ilisimasaqarfigisimanngilaa.
- Takornarianit arlaannut tunngasunik aperineqarnissara annilaanngatigisorujussuuara, nunamiippungami siornatigut tikeraarsimanngisaannakkanni. Tassanngaannartorujussuarmik aallarsimavunga, Heidi Schermer oqaluttuarpoq.
Ilinniarnertuunngorlaatut Kalaallit Nunaata kipisaffigisimanera pissutigalugu maanga tikissimanngilaq. Ilinniarnertuunngorniaqataasa ilarpassui Kangianut angalasarsimapput assigiinnillu oqaluttuassaqarlutik tikittarsimallutik. Heidili allaanerusumik misigisaqarusussimavoq. Kammalaatai marlussuit Kangerlussuarmiissimapput, taakkualu pisortaat oqaloqatigisimavaa, tamatulau kingorna angallassisartutut sulilernissaa inississimalluni Profil Rejserip aamma taamanikkut Team Arctic akornanni suliffittut avitseqatigiiffiusutut.
Sulilernissaanut aallaaviusoq tassaasimavoq ukiup affaani sulinissaa. Isumaqatigiissut qaangiummat aperineqarpoq piffissaq tamaat atorfeqarluni sulilerusunnginnersoq.
Heidi akuersisimavoq, kisiannili ukiup ataatsip missaa sinnerlugu tamaaniinnissaminik naatsorsuutiginnissimanani.
- Ukioq ataaseq missiliorlugu suleriarlugu angerlarniarpunga ilinniarlungalu. Karakterit angusakka pitsanngorsarniartussaavakka, antropologiimi ilinnialersinnaaniassagama, Heidi oqarpoq, taamaattorli Kangerlusuup periarfissaqarnera paasisimallugu.
Heidi Schermer pillugu ilanngutassiaq tamaat aviisimi AG-mi sapaatip-akunnerani matumani saqqummersumi atuaruk, akiliillutit ugguuna iserfigisinnaavat: