Inissaqartitsinnginneq: Kinguaassiuutitigut atornerluisimasut sakkortunerusumik pineqaatissinneqanngitsoortartut
Kinguaassiuutitigut atornerlusimasunut pineqaatissiissutigineqartartut annertusitinneqarnissaannik kissaatigisaq piviusunngortinneqassanngikkallarpoq, tamanna inatsisinik atuutsitsinermut ministerip Nick Hækkerupip Inatsisinik atuutsitsinermut Naalakkersuisumut Martha Abelsenimut allagaani takuneqarsinnaavoq
Naalakkersuisut oktoberip 14-iani Sofia Geislerimut (IA) akissuteqarnerminni, peqqarniinnerpaamik pinerluuteqarsimasut, sivisunerpaamik pinerluuteqarsimasut inissiisarfianni maanna ukiuni qulini inissinneqartarnerat assersuutigalugu ukiunut 16-inut sivitsorneqarnissaa pillugu kissaateqarnertik ersersippaat.
Matumani siunertarineqarluni, ukiukinnerusunik kinguaassiuutitigut innarliisarnerpassuit nungutinneqarissaat.
Sermitsiaq.AG-p inatsisinik atuutsitsinermut ministerip Nick Hækkerupip Martha Abelsenimut juullernissaa ullunik sisamanik sioqqullugu allagai takusimavai, allakkani atuarneqarsinnaavoq, pinerluuteqarsimasut inissinneqartarnerannut tunngavigineqartoq allanngortinneqarpat, pinerluuteqarsimasunut inissiisarfimmut inissinneqartussarpassuit inissaqartinneqaratillu isumaginnittussaqanngitsut.
Naatsorsuisoqarsimasoq
Inatsisinik atuutsitsinermut ministeeriaqarfik kissaatigisat malitsigisaannik inissatigut isumalluutissatigullu unammilligassaasinnaasut pillugit erseqqinnerusumik naatsorsuisimavoq.
- Naatsorsuinerit takutippaat, kissaatigineqartutut pinerluuteqarsimasunut inissiisarfimmut sivisunerusumik inissiisoqartalerpat, inissiisarfinni inissat sinningaatsiarlugit inissiisoqartalissasoq kiisalu inissinneqarnissamut utaqqisut amerleriarujussuassasut, taamaalilluni pineqaatissinneqarluni eqqartuunneqarnermiit pineqaatissiissutip naammassineqarnissaanut piffissaq sivisunerusoq ingerlasalissaaq, Nick Hækkerup allappoq, nangillunilu:
- Persuttaasimasut, pinngitsaaliillutik atoqateqarsimasut, meeqqamik 15-it inorlugit ukiulimmik kinguaassiuutitigut innarliisimasut, toqutsisimasut toqutseriarsimasullu pinerluuteqarsimasut inissiisarfianniisinneqartarneranni piffissaq 10 procentimik sivitsorneqassappat 100 procent sinnerlugu inissiisoqartalissaaq, 100 procentimillu piffissaq sivitsorneqassappat inissat sinningaatsiarlugit inissiisoqartalissalluni.
Pinerluuteqarsimasunut inissiisarfiit amerlanerit sananeqartariaqartut
Nick Hækkerupip taamaammat oqaatigaa, ”sivisunerusumik inissiisoqartarnissaanik kissaatigisaq siunertamut naapertuunnavianngitsoq, kinguneqaataasinnaasut taakku isumaginiarlugit iliuuseqartoqanngippat”.
Inatsisinik atuutsitsinermut ministeri isumaqarpoq, pinerluuteqarsimasunut inissiisarfimmik ataatsimik amerlanerusunilluunniit sanaartorneq aaqqiissutaasinnaasoq, ”tamannali aningaasartuuteqarnerulernermik nassataqassasoq, soorlu aamma sanaartortoqassappat piffissaq sivisooq ingerlasariaqassasoq”.
Ilanngullugu oqaatigaa,”Pinerluuteqarsimasunik Isumaginnittoqarfik naliliisimasoq, isertitsivimmi nutaami arlalinniluunniit amerlanerusunik sulisussanik pisariaqartinneqartunik sulisussarsiorsinnaaaneq maannakkorpiaq ajornassassoq”.
Piffissaq qaninnerusoq eqqarsaatigalugu piviusorsiortuunngitsoq
Taamaammat siunnersuutip piffissami qaninnerusumi naammassineqarsinnaanera piviusorsiortuunngilaq, piffissarlu ungasinnerusoq eqqarsaatigalugu ajornartorsiutinik annertuunik nassataqarsinnaalluni, Nick Hækkerup oqarpoq.
Nick hælkkerupip akissutaa Naalakkersuisunut januaarip 23-ani saqqummiunneqaraluartoq, Naalakkersuisut aalajangersimapput Martha Abelsen inatsisinik atuutsitsinermut ministerimut Nick Hækkerupimut saaffiginneqqissasoq ”Kalaallit Nunaanni pinerluttulerinermik inatsisip allannguutissaatut siunnersuusioqqullugu, taamaalilluni inatsimmi § 147-mi piumasaqaat qaffanneqarsinnaaqqullugu”.