Inissaqartitsiniarneq pillugu suliami akisussaatitsisoqanngitsoq

- Tamanna imminermi pitsaasuunngilaq, Inga Dora G. Markussen (S) siunnersuutini ukiup affaanik kingusinaartumik marlunngornermi Kommunalbestyrelsimi oqaluuserineqarnera pillugu oqarpoq.

Inga Dora G. Markussenip siunnersuutigisimavaa, kommunip inissaqartitsiniarluni suliaani politikkikkut akisussaasumik inissiisoqassasoq. Siunnersuut siullermik kommunimi ingerlatsiviup inassuteqaataa malillugu itigartitsissutigineqarsimavoq.

Namminersorlutilli Oqartussat Nakkutilliisui akuliussimapput, Nakkutilliisullu aalajangersimapput, siunnersuut kommunalbestyrelsimi oqaluuserisassanngortinneqassasoq. Kommunimilli tamanna akerlilerneqarsimavoq Nakkutilliisullu aalajangeeqqusimallugit, tamannalu juunip qulingani pisimalluni.

Siumumi politikkeri isumaqarpoq, pisimasumut tamarmut ilinniutaasariaqartoq, kommunalbestyrelsimi ilaasortat siunnersuutimik oqaluuserineqarnissaannut atatillugu kiffaanngissuseqarnerusarnissaat:

Sunniiniartoqarsinnaanngitsoq

- Borgmesteri ingerlatsivillu kommunalbestyrelsimi suut oqaluuserineqarnissaannut sunniiniarsinnaanngillat, taanna oqarpoq.

Siunnersuut februaarimili suliarineqareersimasussagaluarpoq, taamanerniili allanik pisoqarsimaqaaq. Inissaqartitsiniarluni suliaq pillugu Kukkunersiuisut misissugaat saqqummiunneqarsimapput. Ilaatigut nutaamik borgmesteqalersimavoq, Charlotte Ludvigsen asfaltiliorfimmik 20 millioner koruuneerluni pisiaqarnissamut, kommunimi aningaasaqarnermut ataatsimiititami suli suliarineqanngitsumut atsiorsimanera saqqummiunneqarneqarnerata kingorna borgmesteritut tunuarmat.

Inga Dora G. Markussen isumaqarpoq, Charlotte Ludvigsenip tunuarnerata takutikka, siunnersuutigisimasami oqaluuserineqarnissaanut pissutissaqarluarsimasoq.

- Tunngavilersuutigisimavaat, kommunalbestyrelsi politikkikkut akisussaasumik inissiisinnaanngitsoq. Borgmesterili asfaltiliorfik pillugu suliami politikkikkut akisussaasuugami tunuarsimavoq, Inga Dora G. Markussen oqarpoq.

Illuatungiliuttut ajornerusumik inissisimasut

Tamtuma saniatigut politikkeri isumaqarpoq, suliaq pineqartoq aqqutigalugu apeqquserneqarsinnaasoq, kommunalbestyrelsimi ilaasortat inatsisinut tunngassuteqartunik oqimaattunik oqaluuserinninnissamut qanoq piareersimatiginersut:

- Illuatungiliuttut eqqartuussissuserisumit ikiorserneqarnissamut atuisinnaanngillat, kommunimilli assersuutigalugu siunnersuutinnik itigartitsiniarluni aamma inissaqartitsiniarneq pillugu suliamut atatillugu eqqartuussissuserisut atorluarneqarsimapput.

- Uagut periarfissatuarisimavarput, Nakkutilliisut nalunaarutaannik Nakkutilliisullu aalajangiussaannik utaqqisaqarnissaq, qujanartumilli politikkikkut akisussaasuliinissaq Kommunalbestyrelsimut piginnaatitaaffiusoq nakkutilliisut isumaqatigisimavaat, Inga Dora G. Markussen oqarpoq, nangillunilu:

- Tamanna nuannaarutigaara, kisianni kommunalbestyrelsimi ilaasortaannaasugut suliassanik oqimaatsunik suliaqarnissaq pineqartillugu ajornerusumik inissisimatinneqarpugut, uagummi ilaasortaannaavugut. Taamaammat Nakkutilliisoqarneq pingaaruteqarpoq, tamannalumi aamma ilikkarparput, Inga Dora G. Markussen oqarpoq.

Akisussaasumik inissiisoqanngitsoq

Inga Dora G. Markussenip inissaqartitsiniarluni suliami akisussaasumik inissiisoqarnissaanik siunnersuutaa suliarineqarsimavoq, itigartitsissutigineqarlunili. Siumumit oqaatigineqarpoq, siunnersuutip saqqummiunneqaqqaarneraniilli pisoqarsimaqimmat, partiimit iliuuseqaqqittoqarnianngitsoq.

- Borgmesteri pineqartoq borgmesteriujunnaarnikuummat, suliamilu allami politikkikkut akisussaaffimmik tigusisimammat, siunnersuutip suliarineqaqqinnissaa pisariaaruppoq, partiimit ikinnerussuteqartutu oqaaseqaammi allassimavoq.

Kommunalbestyrelsip ataatsimiinnerani Juaaka Lyberth IA Nalerarlu sinnerlugit oqaaseqartartuuvoq. Taassuma suliamut atatillugu partiit isumaat imatut saqqummiuppai:

- Kommunimi politikkerit arlaannaalluunniit suliani pineqartuni imminnut iluaquserniarlutik iliuuseqarsimanngillat, ingerlatsiviup aqutsineranut tatiginnillutik tutsuiginnillutillu suliaqarsimapput. Periusissiamut tunngaviusut kommunalbestyrelsimi ilaasortanit tamanit akuersaarneqarsimapput, aamma aningaasalersuinissaq kommunillu ukiumut missingersuutaasa tamarmiusut akuersissutigineqarnerani tamarmik tapersiisimapput.

- Tassa suliamik ingerlatsinermi tamarmiusumi politikkikkut tapersersuisoqarsimavoq. Taamaammat IA-mit Naleqqamillu isumaqarput, inuk ataaseq inuilluunniit ataasiakkaat Kommuneqarfik Sermersuumi inissaqartitsiniarluni politikkikkut ingerlanneqasimasunut akisussaasumik inissiisoqarnissaanut tunngavissaqanngilaq, oqaaseqartartoq oqarpoq.

Atorunnaarsitsinissamik suliaq ingerlanneqartoq

Ineqarneq pillugu suliami pineqarpoq, kommunip inissianik namminersortunit attartoriarluni Nuummi innuttaasunut inissaminnik utaqqisunut attartortitseqqiisarsimanera.

Nakkutilliisut taamatut periuseqarsimaneq kommunip piginnaatitaaffiisa avataaniittoq nalilersimavaat, tassani kommuni aaqqissuussatigut annaasaqangaatsiarnera pissutigalugu, tamannami innuttaasunut ataasiakkaanut aningaasatigut tapersiinertut isigineqarmat.

Kommunimit siusinnerusukkut ilisimatitsissutigineqarnikuuvoq, inissianut 400-t missaanniittunut kommunip attartorsimasaanut tunngatillugit atorunnaarsitsinissamik periusissiaq suliarineqartoq. Inissiat aqqaneq-marluk inuussutissarsiuteqartumit attartorneqarsimapput, kommunilu taakkunannga pisiaqarusussaguni isumaqatigiissummi pisiaqarsinnaanermut tunngasortaa kommunimit atorneqarsinnaavoq. Kukkunersiuisimasup naatsorsuisimanera malillugu, taakku kommunimit pisiarineqassappata katilugit 790 millioner koruuninik naleqassapput.