Nuuk

Inissaqartitsiniarlutik pingaarnersiuisariaqartut

Nuummi Naluttartut Klubbiata ilaasortat sapinngisamik amerlasuut inissaqartikkumallugit meeqqanut Kajak Polo atorunnaarsittariaqarsimavaa meeqqallu mikinerit piffissamik nalunnermut atortagaannik sivikinnerulersitsisariaqarsimalluni

Nalunneq atorunnaartussaajunnaarluni Nuummi atugaalersimavoq. Naluttartut Klubbiannut siulittaasoq Gunnar Nielsen suli allamik tasiliamik nalunnguartarfeqarsinnaaneranik, sungiusarnermut unammiuaarnernullu piukkunnarnerusumik, kissaateqaraluarpoq

Meeqqat mikinerit anginerillu Naluttarfik Malimmi tasiliami nalunnguartarfimmi tungujortumik qaamasumik qalipaatilimmi qiimaqalutik nalunnguarput. Meeqqat annerumaat itinermi utertaqattaarlutik nalunnguarput, minnerumaallu ajornartorsiutiginagu naqqanniffigeqqarsinnaasaminni nalunnguarujoorlutik. Nuummi Naluttartut Klubbiat naluttarfimmi tiimeqarpoq, angajoqqaallu nalunnguartarfiup eqqaani sumi tamaani issiaarrapput oqaloqatigiillutillu imaluunniit atuagassianik atuarlutik.

- Tiimit naluttartut klubbiannut atugassiissutigineqarsimasut tamakkiisumik atorneqarput. 400-t missaannik ilaasortaqarpugut, taakkunanngalu 300-t missingi meeraallutik. Meeqqanut mikinernut piffissaliussat 45 minutsiniit 30 minutsinut sivikillisariaqarsimavavut, Nuummi Naluttartut Klubbiannut siulittaasoq, Gunnar Nielsen, oqarpoq.

Nuummi susoqarnersoq Nuuk Ugeavisimi oqaluttuanik amerlanernik atuarsinnaavutit. Aviisi akeqanngitsumik uani pisiariguk:

Powered by Labrador CMS