Inissaaleqinerup illoqarfiit mikisut ipitippai
Ilinniartitsisoq atorfinitsinneqaqqammersoq akunnittarfimmi najugaqartariaqarpoq. Allami inissaqannginnami. Qasigiannguani inissaaleqinersuaq naalliunnaqaaq, tassanilu ukiut 20-t sinnerlugit sanaartortoqarsimanngilaq. Namminersorlutik Oqartussat inissiat 48-t isatersimavaat – nutaanik sanaqqinnatik.
Qasigiannguani ilinniartitsisoq atorfinitsinneqaqqammersoq immaqa akunnittarfimmi najugaqartariaqassaaq. Illoqarfimmi inissiamik ataasinnguamilluunniit nassaassaqanngilaq, aviisi AG allappoq.
- Tupinnaqaaq ilinniartitsisoq avataaneersoq ataasiinnannguaq taama inissarsiuminaatsigimmat akunnittarfimmi najugaqartittariaqalersinnaagatsigu. Tamanna akisuvallaaqaaq. Naammaginanngilluinnarpoq, atuarfiup pisortaa Aqqa Samuelsen oqarpoq, taannalu aamma Kommune Qeqertalimmi (Siumut) borgmesterip tulleraa.
Namminersorlutik Oqartussat ukioq manna illoqarfimmi blokkit inissialiat sisamat isaterpaat. Taartissaannik nutaanik sanatitsinatik.
Maanna illoqarfik inissaaleqiffiusorujussuuvoq.
Kingullermik ukiut 20-it sinnerlugit matuma siornatigut Qasigiannguani inissialiortoqarsimavoq.
- Illoqarfimmi maani ilaqutariit meerartallit inissaaleqisorujussuupput. Inuit, kommunimik kivitseqataasinnaasut qimarrapput. Ilaat Nuummut, taanna kikkunnit tamanit kajungerineqaqimmat.
- Qasigiannguit illoqarfik nuannersuuvoq ingerlalluartoq, pinngortitamik alianaatsumik avatangiisilik. Inissaaleqinerujussuarli pissutigalugu inunnik piginnaasalinnik, ilinniarluarsimasunillu pissarsiuminaappoq, Aqqa Samuelsen oqarpoq.
Aviisimi AG-mi allaaserisaq tamakkerlugu atuarsinnaavat. Aviisi uani pissarsiariuk: