Ilinniarneq

Inissaaleqinerup ilinniarfissat nutaat akimmisaartippai

Ilaatigut ARTEK, issittumi ingeniørinngorniarfik, annertusiinissamik kissaateqarpoq maannakkut inissatigut atukkat naammassisinnaasaannit annertunernik, Issittoq pillugu Ilinniartitaanermut ilisimatusarnermullu ministereqarfiup periusissiaani allassimavoq

Maannakkorpiaq ingeniørinngorniat inaani Sisiumi Apissimi 33-nik ineeraqarpoq sisamanillu inissiaqarluni. ARTEK-imili ilinniartunut 125-nut inissaqassappat inissat amerlisariaqarput

Ilinniartitaaneq aamma naalakkersuisuutitaqalersut isumaqatigiissutaani pingaartinneqarluartut ilagaat.

Inissatigulli ajornartorsiuteqarneq peqqutigalugu ineriartorneq killilerneqarpoq, 'Issittumi ilisimatusarnermut ilinniartitaanermullu periusissiaq' nutaaq ilinniartitaanermut ilisimatusarnermullu ministereqarfimmeersoq naapertorlugu.

- Danmarks Tekniske Universitetip kissaatigaa issittumi ingeniørinngorniarnermi ilinniartut 125-it ilinnialersinnaasarnissaat (2016-imi aasaanerani 24-ullutik). Tamanna tigussaasumik aporfeqarpoq, tassalu Sisimiuni inissat naammannatik (ilinniartunut inissiat ilinniartitsinermilu inissat) naak amerlanerujussuarnik ilinniartoqarsinnaagaluartoq, allaaserisaqartut allapput.

Inissatigut amigaateqarneq
Aamma maluginiarpaat Pingortitaleriffiup maannakkut siunissamilu illuutai ulikkaareersut suliluunniit naammassinatik, sulilu ilisimatuunut tikeraanut ilinniartunullu inissatigut amigaateqartoqarluni.

- Taamatut ajornartorsiuteqarneq peqqutigalugu maannamut aamma issittumi ingeniørinngorniarnissamut periuseq assilillugu issittumi maskinmesterinngorniarnissamik ilinniarnissamut pilersaarutit piviusunngorsinnaanngillat, nalunaarusiami allassimavoq.

Ineriartornermut killiliisoq
Isertuussiniartoqanngilarlu – Kalaallit Nunaanni inuusuttut pikkorinnerulernissaannut inissatigut atugassat killiliinerat uggornarpoq.

- Inissatigut killiliinerit nunatsinni ilinniartitaanermi Kalaallillu Nunaanni inuusuttut akornanni ilinniarsimassutsimik qaffassaanissamik anguniagaqarnermut naapertuutinngilaq, allaaserisaqartut allapput.

Atuaruk: Issittumi ingeniørit 50-issaat Artek-imit naammasseqqammerpoq

Allaaserisaq tamaat AG-mi uani sapaatip-akunnerani saqqummertumi atuaruk. Aviisi uani pisiariuk:

Powered by Labrador CMS