Inip siulersuisui allannguuteqarput

A/S Inissiaatileqatigiiffik Ini Sisimiuni Inip qullersaqarfiani ileqquusumik marlunngormat ataatsimeersuarpoq, nutaanillu pingasunik siulersuisoqalerluni.

Ataatsimeersuarnermi siulersuisuni siulittaasoq Jette Larsen qinerneqaqqippoq.

Taassuma saniatigut A/S Inissiaatileqatigiiffiup Inip siulersuisuni ilaasortat nutaat Carsten Pietras, Karin B. Orgland aamma Jakob Abelsen tikilluaqquai.

Ataatsimeersuarnermut atatillugu siulersuisuni ilaasortaasimasut Kristian May, Lissi Olsen aamma Bjarne Krog-Jensen inuulluaqquneqarput.

Angusat naammagineqartut
Naalakkersuisut siulittaasuata Aleqa Hammondip Siumumeersup Ini nersualaarpaa.

- Naalakkersuisut sinnerlugit A/S Inissiaatileqatigiiffik INI 2013-imi suleqatigiilluarsimanermut qujaffigerusuppara. Naak pitsanngoriaatissaqartoqarsinnaagaluartoq, ingerlatseqatigiiffik naammaginartunik angusaqarsimammat nuannaarutigaarput. INI suli ineriartorpoq, siulersuisuni ilaasortaasimasut ineriartornermut tamatumunnga pitsaasunik tunniussaqarsimapput. Taakkununnga Naalakkersuisut nersorinnissutaat sulisimanerannullu qujassuteqaataat apuukkusuppakka, Aleqa Hammond oqarpoq.

Ukiumoortumik nalunaarummi takuneqarsinnaavoq 2013-imi akileraarutit ilanngaatigeqqaarnagit sinneqartoorutit 1,4 mio. kruuniusut akileraarutillu ilanngaatigereerlugit sinneqartoorutit 924.000 kruuniullutik, angusallu naammaginarput.

Siornamut naleqqiullugu ingerlatseqatigiiffiup ilanngaatigisassat ilanngaatigereerlugit kaaviiaartitai 3,6 mio. kruuninik qaffariarput, tamannalu akiliutinit isertitat qaffariarsimanerannit kiisalu teknikkikkut siunnersorneqarnermit kiffartuunneqarnermillu kaaviiaartitat qaffasinnerusimanerannit pissuteqarpoq.

INI-p piffissap ingerlanerani ineqarnermut allaffissornikkut aqutsivittut ingerlatseqatigiiffinngortinnissaa pilersaarutaavoq.