inissiat

Inip attartortunut piumasaqaatit sakkortusivai

Inissiaatileqatigiiffik Ini, ineqarnermut akiliummut akiligassanik ikilisaaniarluni immikkut iliuuseqarnialerpoq. Tamatuma saniatigut ullut 14-ikkaarlugit akiliisarneq atorunnaarsinneqassaaq

Inip inissiaataanik attartortut annertunerusumik piumasaqarfigineqalissapput.

Nuna tamakkerlugu inissiaatileqatigiiffik taamatut nalunaaruteqarpoq.

Oktobarip aallaqqaataanit atuutilersumik attartortut, Inip inissiaataanik attartornissamik isumaqatigiissuteqartut, ineqarnermut akiliummut pinngitsooratik PBS atorlugu akiliisalissapput.

– Ineqarnermut akiliummut akiligassat Inip ikilisaqataaffigerusuppai. Suliniutip tamatuma ilaatut ineqarnermut akiliut pinngitsoorani PBS-ikkut akilerneqartalissaaq. PBS-imik aaqqissuussakkut ineqarnermut akiliutip akilernissaa attartortunut ajornannginnerulissaaq, Inimilu allaffissornermik annikinnerusumik kinguneqassalluni, inissiaatileqatigiiffik paasissutissiivoq.

Inili nassuiaavoq pissutsit immikkut ittut atuunneranni immikkut ittumik aaqqissuussisoqarsinnaasoq, assersuutigalugu attartortoq PBS-imik aaqqissuussinermut akuerineqarsinnaanngippat.

Ullut 14-ikkaarlugit akiliisarneq atorunnaassaaq
PBS aqqutigalugu akiliisarnissamik piumasaqaatip saniatigut siunissamissaaq Inimi ullut 14-ikkaarlugit ineqarnermut akiliummut akiliisoqarsinnaajunnaassaaq. Ullut 14-ikkaarlugit akiliisarneq ullumikkut allaffissornermik artukkiillunilu ineqarnermut akiliutit naatsorsorneqarnerannut kinguarsaataasarpoq.

Ullut 14-kkaartumik akissarsiaqartut aningaaserivimmi budgetkontoliortitsinissaat taarsiullugu Inimit innersuutigineqarpoq.

Juulip aallaqqaataanit ullut 14-ikkaarlugit akiliisarnissanik nutaanik isumaqatigiissuteqartoqarsinnaanngilaq, ullullu 14-ikkaarlugit akiliisarnermik isumaqatigiissutit oktobarip aallaqqaataanit atorunnaassapput, inissiaaleqatigiiffik Ini paasissutissiivoq.

Powered by Labrador CMS