INI: Akiitsut 11 mio. koruuniusut akilersinneqarsimasut
Inissiaatileqatigiiffik INI A/S sullitami akiitsoqalinnginnissaannik siunnersuisarnermini iluatsitsilluarsimavoq. Suliniuteqarnikkut siorna inigisanut akiitsorineqartut 11 millioner koruunit akilersinneqarsimapput.
Sulisussanik, attartortut inigisaminnut akiitsoqaleriartuinnarlutik aningaasaqarnikkut ajutuunnginnissaat anguniarlugu, siunnersuisartussanik atorfinitsitsisimaneq imminut akilersinnaasimavoq.
Namminersorlutik Oqartussat inissiaatileqatigiiffiutaat INI A/S, 2019-imi qaammatini pingasuni siullerni illoqarfinni annerni tamani sulisunik atorfinitsitsisimavoq, tamatumalu malitsigisaanik akiitsorineqartut 11 millioner koruuninik ilanngarneqarsimallutik. INI A/S 2019-imut aningaasanut inatsimmit fire millioner koruuninik, siunnersuinermut atugassanik aningaasaliiffigineqarsimavoq.
Tamanna inissiaatileqatigiiffimmut taamaallaat iluatsitsiffiunngilaq, aqutsisut 2019-imut naatsorsuusiornerminnut atatillugu nalunaarusiaminni allapput.
- Isumaginnittoqarfik aqqutigalugu ineqartinneqartut pillugit suliniuteqarnikkut anisitaasartut ikilisinneqarsimapput, aamma Allorfik kommunillu suleqatigalugit attartortut akiliisinnaassutsimikkut unammillernartuutillit allatullu inuuniarnikkut ajornartorsiutillit siusissukkut suliniuteqarfigineqarnerat iluatsitsiffiulluarsimavoq, aqutsisut nalunaarusiaanni allassimavoq.
Ukiumut angusat
Namminersorlutik Oqartussat inissiaatileqatigiiffiutaat INI A/S 2019-imi akileraarutit suli peernagit 1,9 millioner koruuninik angusaqarpoq, tassa naatsorsuutigisamit koruuninik millionit affaanik pitsaanerusut, tamatumunnga pissutaavoq koruuninik millionit affaanik annertussusilinnik aataasiartumik isertitaqarsimaneq.
- Sinneqartooruteqarujussuarnissaq siunertarinngilarput, akerlianik 1,5 millioner koruunit missaanik ukiumut angusaqarnissarput siunertaraarput, INI-mi pisortaq Henrik Rafn Sermitsiaq.AG-mut nassuiaavoq.
Sulisoqarneq eqqarsaatigalugu sulisut 147-niit 161-inut amerlineqarsimapput, attartortut aningaasaqarnikkut ajornartorsiutillit siunnersorneqartarnissaat matumani siunertaalluni.
Ingerlatseqatigiiffimmit aamma ilanngullugu allanneqarpoq, inissianik aqutsineq digitaliseeriinikkut eqaannerusunngortinneqarsimasoq, ilaatigut attartortorisat tuusintilikkaat internetsikkut imminnut sullissinnaalersinneqarsimallutik.
Suliffiit allat assigalugit, INI A/S 2019-imi it-kkut nutaamik atortorissaarutitaarniarnermini naatsorsuutigisamit unammilligassaqarnerusimavoq.
Aserfallatsaaliugassanut aningaasat amerlanerit
Akiitsorilersimasat INI-p naatsorsuutaanut sunniuteqanngillat, ineqarnermut akiliutigisat ineqarfiit immikkoortortaqarfiinut assigiinngitsunut tuttarmata, assersuutigalugu siunnersorneqarnikkut aserfallatsaaliinissanut aningaasassaqarnissaq pitsaanerulersinneqartarmat.