INI-p siulersuisuini ilaasortat nutaat marluk
Namminersorlutik Oqartussat ingerlatseqatigiiffiutaani INI A/S-imi siulersuisut ullumi ileqquusumik ataatsimeersuarmata, siulersuisut nutaanik marlunnik ilaasortaatitaqalerput.
Namminersorlutik Oqartussat ingerlatseqatigiiffiutaanni siulersuisunut ilaasortat allanik taarsersorrneqartuarput, Royal Greenland A/S-imitulli ingasatsiginngitsumik.
Inga Dora Markussen politikkikkut suliaqarnerorusukkami INI-p siulersuisuiniit tunuarniarluni ukioq manna siusinnerusukkut aalajangersimavoq, siulersuisunilu ilaasortaaffik inueruttoq Johanne L. Knudsenimit inuttalerneqarsimalluni.
Line Frederiksenip, Tele Greenlandimi aningaasaqarnermut pisortaasup aatsitassarsiutileqatigiiffiup AEX Goldip siulersuisuini ilaasortatut atuuffissani ukkatarinerorusussimagamiuk pisortatut tunuarsimavoq, Kalaallit Airports A/S-imilu suliniuteqarnermut pisortamit Aviaaja Karlshøh Knusenimit taarnerneqarluni, taanna Tele Greenlandip siulersuisuinit siusinnerusukkut tunuarpoq.
Mads Barlach Christensen ingerlatseqatigiiffimmi siulittaasuuginnarpoq. Taamatuttaaq Kristian May siulittaasuuginnarluni.
Sinneqartoorutit affaannanngorsimasut
Ingerlatseqatigiiffiup ukiumut naatsorsuutaani atuarneqarsinnaavoq, ukiumut angusat ukiup siulianut sanilliullugit affaanngorsimallutik 1.349.000 koruuniusut. Kaaviiaartinneqarsimasut 5,5 millioner koruuninik amerlisimallutik maannak 98 millioner koruuniupput, tamatumunnga nassuiaatigineqarpoq, illuutinik kiffartuussinermi kiisalu teknikkikkut suliaqartarnermi isertitaqarnerulersimaneq.
Aqutsisut Henrik Rafnimik pisortaanillit ukiut angusat naammagisimaarnerarpaat. Ukiumut nalunaarusiami aamma oqaatigineqarpoq, 2019-imi akiitsunik apparsaanermik iluatsitsilluarsimaneq 2020-mi nangillugu ingerlanneqarsimasoq, taamalu akiitsut 13,1 millioner koruuninik ikilisinneqarsimallutik.