Ini Nusukamut: Ini inissianik allaffissornikkut aqutsiinnarpoq

Nunaqavissut Suliffiutillit Kattuffiata neriuutigaa Naalakkersuisuutitaqalersut innuttaasunut kiffartuussineq aallartissagaat. Ilaatigut Inissiaatileqatigiiffiup Inip nutarterneqarnissaa marlunngornermi siunnersuutigalugu.

Nusukamiimmi isumaqarput Inissiaatileqatigiiffik Ini nutartertariaqalersoq.

- A/S Ini suliassanik agguaasarnera nutarterneqassaaq piaartumik pisariaqarpat ingerlatinnerit tamakkiisumik kommmunini ingerlanneqassaput aamma ilinniartoqarnermut piumasaqaateqalernissaa angusariaqarpoq. Nalunngilarput A/S Ini qanoq suliffeqarfinnut mikisunut aammalu akunnattunut nunatsinni pigineqartunut pingaaruteqartigisoq. Taamaattumik nutaamik piaartumik sutigut tamatigut nutarternissaa pisariaqarpoq tassuungalu suleqataanissatsinnut piareersimavugut.

- Piaartumik aalangerneqassaaq suliffeqarfiit inuiaqatigiit pigisaat sumiluunit unammilleqatigiiffiusumi namminersortunik unammillertassanngillat tamannalu piaartumik unitsinneqassaaq.

Atuaruk: Nusuka: Tunisassiorfinnik puttasunik pilersitsisoqarli aamma Ini nutarteriffigineqarli

Ini akissuteqarpoq: Ini najugaqarfinnut allaffissornikkut ingerlatsiviuvoq
Maannalu Inip pisortaanera Jukku Mølgaard Nunaqavissut Suliffiutillit Kattuffiata siulittaasuanut Gerth B. Lyngemut akissuteqarpoq.

Jukku Mølgaardip A/S Inissiaatileqatigiiffik Ini najugaqarfinnik allaffissornikkut ingerlatsiviummat. Inissiat Namminersorlutik Oqartussanit kiisalu Kommune Kujalleq, Qeqqata Kommunia aammalu Qaasuitsup Kommunianit pigineqarmata.

- Inilu allaffissuussinissamik piginnittunik isumaqatigiissuteqarneq tunngavigalugu ingerlatsisuuvoq, Jukku Mølgaard allappoq.

Jukku Mølgaardip ilanngullugu nassuiaatigaa najugaqarfiit immikkoortortaat tamarmik aningaasatigut imminnut napatittuummata, Inillu ingerlanneqarnerata avataani inissisimallutik. Najugaqarfiillu immikkoortortaat nuna tamakkerlugu 40-it missaannik amerlassuseqartut aamma unnerpoq.

- Najugaqarfiillu tamarmik immikkut aserfallatsaaliinissamut ileqqaagaasa amerlassusaat aallaavigalugit aserfallatsaaliisoqartarpoq, missingersuutit illuutilinnit akuersissutigineqarsimasut tunngavigalugit, Jukku Mølgaard allappoq, nangillunilu:

- Najugaqarfiit immikkut ingerlanneqarput, aningaasaqarniarneralli ilungersunartorsiorfiusinnaasoq peqqutaalluni aserfallatsaaliinissaq killeqangaatsiarsinnaasarluni.

Jukku Mølgaardip ilanngullugu erseqqissaatigaa siullermeerutaasumik suliariumannittussarsiuussineq ingerlanneqartartoq, maleruagassallu atuuttut malillugit pisarluni. Piumasaqaatillugooq ilagisarpaat suliffeqarfiit akileraarutitigut akiitsoqannginnissaat aammalu sillimmasersimanissaat.