inissiat
Ini: Kiassarnerup akiisa qaffanneqarnerat akiligassat amerlanerulersut
Inissiaatileqatigiiffik Inimut akiligassat 51 million koruuninit 75 million koruuninut qaffapput ukiut pingasut ingerlaneranni. Kisitisit Namminersorlutik Oqartussat inissiaataannut kisimik atuupput
Akiligassarineqartut qaffakkiartuinnavipput ukiuni kingullerni.
Tamanna Inissiaatileqatigiiffik Inimit saqqummiunneqarpoq.
Inimut attartortut katillugit 51 million koruuninik akiligassaqarput 2011-mi. 2012-mi 55 million koruunit akiligassarineqarput, 2013-mi 67 million koruunit kiisalu 75 million koruunit 2014-mi akiligassarineqarlutik. Namminersorlutik Oqartussanuunnaq taama annertutigisumik akiligassaqartoqarpoq. Kommunini akiligassarineqartut qaavatigut aamma akiligassaqartoqarpoq. Kommune Kujallermi innuttaasut kommunit inaataannut innuttaasut 17 million koruuninik akiligassaqarput 2014-mi.
Qaasuitsup Kommuniani innuttaasut kommunip inaanut 9 million koruuninik akiligassaqarput kiisalu Qeqqata Kommuniani innuttaasut 9 million koruuninik akiligassaqarlutik.
Ajornartorsiut kaavittoq
- Kiassarnermut akigitinneqartut malunnaatilimmik ukiuni kingulliusuni qaffariarput. Kiassarnermut akiligassat ineqarnermut akiligassat pingajorarterutigisarpaat. Kiassarnermut ineqarnermut tapiissuteqartarnermut ilaatinneqarsinnaanngilaq, taamaattumik ajornartorsiut tassaniinnerusoq Inimit takusinnaavarput, Inissiaatileqatigiiffik Inimi attaveqaqatigiinnermut pisortaq Else Løvstrøm Sermitsiaq.AG-mut oqarpoq.
Ineqarnermut tapiissuteqartarneq 1978-imeersoq 2001-mi kingullermik aaqqissuunneqartoq Inimit ilisimatitsissutigineqarpoq.
- Ajornartorsiut kaavippoq. Akiligassarineqartut akilerneqanngikkaangata Inissiaatileqatigiiffiit aningaasaqarnerannut eqquisarpoq taamaasilluni aserfallatsaaliinernut akissaqartitsisoqarneq ajorluni. Aserfallatsaaliisoqanngikkaangat kiassarnermut akigitinneqartut annertunerulersarput, Else Løvstrøm oqarpoq.
Akiligassat qanoq isikkoqarnerat ataani takuneqarsinnaapput