inissiat
Ini iigaq sermilik pillugu: Kiffiutissaq nakkarsimagunarpoq
Inimit ilisimatitsissutigineqarpoq Qasigiannguani illut type 71-nik taaneqartut naqqisa oqorsarneqarneri massakkut ingerlanneqaleruttortut, immaqalu Oline Markussenikkut iigaani kiffiutissaq nakkarsimassasoq iluarsineqarsinnaasorlu
Sermitsiaq.AG-mit tallimanngornermi allaaserisatsitut qasigiarmiu Oline Markussen tupaqqavoq Inimit illup attartukkamik iigaa sermersimammat.
Inimit maanna ilisimatitsissutigineqarpoq illu Namminersorlutik Oqartussanit pigineqartoq, inissiaqarfinnilu taakkunani naqqit oqorsarneqarneri massakkut ingerlanneqaleruttortut.
Inimili tusagassiisartut pisortaat, Else Løvstrøm Sermitsiaq.AG-mut naqissusiivoq Ini suliat ataasiakkaat pillugit oqaaseqartanngitsoq, kisianni:
- Oline Markussenikkulli qaliaani taamaattoqarsimappat ilimanarpoq oqorsaatai nakkarsimassasut, iluarsineqarsinnaappullu naternik iluarsaasut illu taanna tikippassuk.
Assit takukkit: Inimit attartortup sermeq sinittarfimmi tupaatigigaa
Ini: Akiliutit uunga tuttarput
Oline Markusseni aamma oqarpoq inigisartik taama akisutigippat, sooq taama aserfallannikuutigissanersoq apeqquserlugu. Oqarlunilu akiminut naleqqutinngilluinnartoq. Inimiit attartornermut akia ilissi naleqqussoraasiuk?
- Ineqarnermut akiliutit sumut tuttarnersut nittartakkatsinni takuneqarsinnaasuaannarput, Else Løvstrøm Inip nittartagaa innersuussutigalugu, taama allappoq.
Inip nittartagaani ineqarnermut akiliutit makkununnga tuttartut takuneqarsinnaavoq:
- Inissianik piginnittunut 22 procentit missaat
- Ingerlatsinermut aserfallatsaaliinermullu 68 procentit missaat
- Aqutsisuusumut akiliutit 10 procentit missaat
Else Løvstrømip aamma ilisimatitsissutigaa Qasigiannguani illuni type 71-nik taaneqartartuni piginnittunut Ini qinnuteqarsimasoq illuni taakkunani iggaviit taarsersorneqarnissaannut, kiisalu aamma illut taakkua kissarsuutaat nutaanik taarserneqassanersut imaluunniit ungasianiit kiassarneqalissanersut nalilersorniarneqartoq.